An teokratiko nga edukasyon maiha na nga ginagamit han mga Saksi ni Jehova. May espesyal nga mga eskwelahan nga igintatagana para ha mga bug-os-panahon nga nagsasangyaw mahitungod han Ginhadian basi bug-os nga matuman nira an ira ministeryo.—2 Timoteo 4:5.

Pioneer Service School. Katapos hin usa ka tuig nga pag-regular payunir, awtomatiko nga nakaenrol an usa ha unom ka adlaw nga pag-ekswela nga mahimo dumarahon ha usa nga Kingdom Hall. Katuyoan hini an pagbulig ha payunir nga magin mas duok kan Jehova, mas epektibo ha ngatanan nga bahin han ministeryo, ngan makapadayon nga matinumanon ha pag-alagad.

School for Kingdom Evangelizers. Inin duha ka bulan nga pag-eskwela gindisenyo ha pagbansay ha eksperyensyado nga mga payunir nga andam bumaya ha ira lugar basi mag-alagad diin man hira itoka. Hito nga paagi, baga hin nasiring hira, “Iini ako; pakadtoa ako,” sugad nga pagsubad ha pinakabantogan nga Ebanghelisador nga nabuhi dinhi ha tuna, hi Jesu-Kristo. (Isaias 6:8; Juan 7:29) Ha ira pagbalhin, bangin kinahanglan mas pasimplehon nira an ira pagkinabuhi. An kultura, klima, ngan pagkaon bangin iba gud ha ira nahiaraan. Bangin kinahanglan pa ngani nira mag-aram hin iba nga yinaknan. Ini nga eskwelahan nabulig ha solo nga kabugtoan nga kalalakin-an, kababayin-an, ngan mga mag-asawa, nga 23 tubtob 65 anyos, ha pagpatubo han mga kalidad nga ira pagkikinahanglanon ha ira toka ngan han mga abilidad nga mabulig ha ira basi bug-os nga magamit hira ni Jehova ngan han iya organisasyon.

Watchtower Bible School of Gilead. Ha Hebreo, an “Gilead” nangangahulogan hin “Pundok hin mga Saksi.” Tikang han kaestablisar han Gilead han 1943, sobra 8,000 nga naggradwar hini an igintoka nga mga misyonero basi magpamatuod ‘tubtob ha sidsid han tuna,’ ngan maopay gud an resulta. (Buhat 13:47) Pananglitan, han siyahan nga may iginpadara ha Peru nga mga naggradwar hini, waray pa kongregasyon didto, pero yana sobra 1,000 na. Han inabot ha Japan an amon mga misyonero, waray pa magnapulo an Saksi didto, kondi yana sobra 200,000 na. Inin lima ka bulan nga pag-eskwela nag-uupod hin pag-aram hin maopay han Pulong han Dios. An mga espesyal payunir, misyonero, Bethelite, o paramangno han sirkito gin-iimbitar nga umiskwela ha Gilead para hin duro nga pagbansay basi makabulig ha pagpauswag ngan pagparig-on han bug-os-kalibotan nga buruhaton.

• Ano an katuyoan han Pioneer Service School?

• Para kan kanay gindisenyo an School for Kingdom Evangelizers?