Malongi ma teokrasi madi diambu dimosi dinene kudi Zimbangi zi Yehova tona thama. Beta vana malongi kudi batu bobo bakiveni mu kisalu ki samuna Kimfumu muingi ‘bamanisa kisalu kiawu mu bumboti.’—2 Timoteo 4:5.

Kalasi yi minzibudi-nzila. Enati nzibudi-nzila medukisa mvu wandi wu thete mu kisalu kiandi ki nzimbudi-nzila, beta kuntedisa mu kota kalasi ki minzibudi-nzila kioki kieta tula bilumbu sambanu kioki kilenda salimina mu Nzo yi Kimfumu yoyi yifikimini. Kalasi beni kieta sadisa nzibudi-nzila kafikama kudi Yehova, kazaba sala kisalu kiandi mu mambu moso, ayi katatamana mu kisalu kiandi.

Kalasi ki Minsamuni Nsamu Wumbote wu Kimfumu. Kalasi beni yeta tula ngondi zole ayi yeta salama mu diambu di vana formasio kudi minzibudi-nzila bobo bayuku mu kisalu ayi bo bakikinini bika bibuangu biawu ayi kuenda ku bibuangi bioso bio badi tsatu awu. Phila yayi beta tuba: “Tala vava ngiena! Wumfidisa!” dede kuandi phila yoyo Yesu katuba, nioni wuba nsamuni nio wuluta minsamuni mioso. (Yesaya 6:8; Yoane 7:29) Nge tia kuenda vuandi ku buala diodi didi thama ayi dieno, yilenda lomba ti wuyuku luzingu lolo kawisi yuku ko. Batu bobo webata koko wedi balenda ba zinzingulu ziawu zinkaka, kuma beni kulenda ba muini, voti kiozi kiwombo viokila ku buala bueno, voti ndiwulu yoyi kawisi yuku ko. Yilenda lomba wulonguka mbembo yi nkaka. Kalasi beni kieta sadisa baphangi ba banketo ayi ba bakala bobo basi ko bakuela, ayi bo bakuela, badi mimvu 23 tii 65, bakudisa bikadulu bi buklisto biobi bilenda kubasadisa mu kisalu kioki bela bavana, ayi bakudisa diela diawu muingi Yehoba ayi kimvuka kiandi babasadila buwombo.

Gileadi, Kalasi yi Watchtower mu diambu di malongi ma Bibila. Mu mbembo yi Ebeleo, “Gileadi” yintia tuba “Kuku ki Kimbangi.” Tona Gileadi yisalimina mu mvu 1943, batu viokila 8000 bamebakila kuna formasio ayi batindu bamisionere mu diambu di vana kimbangi mu phila yifuana “nate ku sukisina nza.” (Mavanga 13:47) Mu thangu bamisionere batula ku tsi Pérou, kadi kimvuka kimosi kuisi ba ko. Vayi lumbu kiaki, bimvuka viokila 1000 bieka kuna. Botula diodi, mu thangu bamisionere batona samuna ku Japon, kadi dikumi di Zimbangi zi Yehova zisi ba ko ku tsi beni. Vayi lumbu kiaki, beka viokila 200000. Malongi ma Gileadi ngondi tanu meta tula, ayi beta longuka malongi ma Bibila mu phinda. Banani beta tedusu mu kalasi beni? Beta tela minzibudi-nzila minene, bamisionere bo badi mu kisalu ki samuna, batu bo beta sala ku Betele, ayi minkengidi mi zungidila. Beta baka formasio yi ngolo mu zaba vuandisa ayi kindisa kisalu mu nza yimvimba.

• Kalasi ki minzibudi-nzila mfunu mbi kidi e?

• Banani balenda kota mu Kalasi ki Minsamuni Nsamu Wumbote wu Kimfumu?