Desde úuchjeakileʼ u j-jaajkunajoʼob Jéeobaeʼ jach nojoch baʼal u yilkoʼob le kaʼansaj ku taal tiʼ Diosoʼ. Bejlaʼeʼ beetaʼan jujunpʼéel escuelaʼob utiaʼal u yáantaʼal le máaxoʼob jach u tsʼaamaj u yóol u kʼaʼaytoʼob le Reinooʼ, utiaʼal beyoʼ ka u ‹tsʼoʼokbesoʼob tubeel le meyaj tsʼaʼantiʼoboʼ› (2 Timoteo 4:5).

Escuela utiaʼal Precursoroʼob. Ken u tsʼáa junpʼéel jaʼab káajak u meyaj bey precursor regular juntúul sukuʼun wa kiikeʼ, ku invitartaʼal teʼ Escuela utiaʼal Precursoroʼoboʼ. Lelaʼ seis kʼiinoʼob ku xáantal yéetel ku beetaʼal tiʼ junpʼéel u Najil Reino naatsʼ teʼ tuʼux kajaʼan le precursoroʼ. Le escuelaaʼ ku yáantik máak utiaʼal u maas biskuba yéetel Jéeoba, utiaʼal u kanik jejeláas bix jeʼel u kʼaʼaytik le maʼalob péektsiloʼ, bey xan utiaʼal u chúukpajal u yóol tiʼ le meyajaʼ.

Escuela utiaʼal le Máaxoʼob Kʼaʼaytik le Reinooʼ. Le escuelaaʼ kaʼapʼéel mes ku xáantal. Jeʼel u páajtal u bin le sukuʼunoʼob yéetel kiikoʼob tsʼoʼok u máan kʼiin káajak u beetik u precursoriloʼob yéetel jeʼel u yóotik u pʼat u yotochoʼob utiaʼal u binoʼob teʼ tuʼuxoʼob maas kʼaʼabéet áantajoʼ. Letiʼobeʼ ku yaʼalikoʼob jeʼex Jesucristo, le j-Kʼaʼaytaj maas nojoch anchajaʼan way yóokʼol kaabeʼ: ‹Jeʼelenaʼ, túuxteniʼ› (Isaías 6:8; Juan 7:29). Ken xiʼikoʼob kajtal yaanal tuʼuxeʼ ku kankoʼob kuxtal jejeláas bixi, ku kankoʼob túumben baʼaloʼob, ku suuktal yaanal clima tiʼob yéetel ku jaantkoʼob uláakʼ janaloʼob. Yaan kʼiin xaneʼ ku kʼaʼabéettal u kankoʼob uláakʼ idioma. Teʼ escuelaaʼ jeʼel u béeytal u bin le máaxoʼob tsʼokaʼan u beeloʼoboʼ bey xan le sukuʼunoʼob yéetel le kiikoʼob maʼ tsʼokaʼan u beeloʼob yaan 23 wa tak 65 jaʼab tiʼoboʼ. Teʼeloʼ yaan u kaʼansaʼaltiʼob le jatsʼuts modos kʼaʼabéet u yeʼeskoʼob teʼ tuʼux kun túuxtbiloʼoboʼ. Le kaʼansaj ken u kʼamoʼoboʼ yaan u yáantkoʼob utiaʼal ka u meyajtoʼob Jéeoba tubeel bey xan utiaʼal u tsʼáaikoʼob le nuʼuktaj kʼaʼabéet ichil u kaajaloʼ.

Escuela Bíblica tiʼ Galaad tiʼ le Watchtoweroʼ. Ich hebreoeʼ le tʼaan «Galaadoʼ» u kʼáat u yaʼal «junpʼéel multun ku meyaj utiaʼal u tsʼaʼabal ojéeltbil wa baʼax». Desde 1943, maas tiʼ ocho mil misioneroʼob tsʼoʼok u kaʼansaʼaloʼob Galaad, tsʼoʼok u túuxtaʼaloʼob kʼaʼaytaj «tak tu maas náachil yóokʼol kaab» yéetel tsʼoʼok u jach bin utsil tiʼob (Baʼaxoʼob 13:47). Le ka kʼuch le yáax misioneroʼob tu luʼumil Peruoʼ, mix junpʼéel múuchʼulil yaan kaʼachiʼ; bejlaʼeʼ yaan maas tiʼ mil u pʼéelaliʼ. Le ka kʼuchoʼob tu luʼumil Japoneʼ, chéen wa jaytúul j-Jaajkunajoʼob yaan kaʼachiʼ; bejlaʼeʼ yaan maas tiʼ doscientos mil u túulaliʼ. Teʼ xook ku xáantal cinco mesesoʼ ku xakʼalxoktaʼal tuláakal le Bibliaoʼ. ¿Máaxoʼob jeʼel u béeytal u binoʼob teʼ escuela tuʼux ku tsʼaʼabal le jach maʼalob kaʼansajaʼ? Letiʼe precursor especialoʼoboʼ, le misioneroʼoboʼ, le betelitaʼoboʼ yéetel le superintendenteʼob tiʼ circuitooʼ. Teʼeloʼ ku kaʼansaʼaltiʼob bix jeʼel u yáantajoʼob utiaʼal u kʼaʼaytaʼal tubeel le maʼalob péektsil tiʼ tuláakal yóokʼol kaaboʼ.

• ¿Baʼax u biilal le Escuela utiaʼal Precursoroʼoboʼ?

• ¿Máaxoʼob jeʼel u béeytal u binoʼob teʼ Escuela utiaʼal le Máaxoʼob Kʼaʼaytik le Reinooʼ?