Na Biblia, tiene dos grupo del maga Cristiano hombre que tiene responsabilidad na congregacion. El maga Testigo de Jehova ta llama kanila “maga anciano y siervo ministerial.” (Filipo 1:1, NW) Ansina tambien el cuantos del maga hermano ahora quien ta sirvi na congregacion. Cosa ta hace el maga siervo ministerial para na bien diamon?

Ta ayudá sila na maga anciano. El maga siervo ministerial activo na diila espiritualidad, fiel y puede kanila confia. Joven pa el cuanto kanila mientras el otro de edad ya. Ta cumpli sila maga importante trabajo que pirmi ta hace adentro na congregacion. Por causa con ese, ta puede concentra el maga anciano na diila responsabilidad para enseña y visitá na maga miembro del congregacion.

Ta dale sila practicál ayuda. Tiene maga siervo ministerial el quien ta sirvi como attendant durante el miting para asisti con aquellos quien ta atende. Mientras el otro ta mira con el sound system, sen del congregacion, ta distribui maga publicacion y ta iscuji teritorio para onde predica el maga miembro del congregacion. Ta ayudá tambien sila mentena con el Kingdom Hall. Tiene vez, ta pidi kanila ayuda el maga anciano para asisti con el maga de edad. El maga siervo ministerial preparao hace maskin cosa responsabilidad que hay dale kanila. Por causa con ese, ta respeta kanila el congregacion.—1 Timoteo 3:13.

Ta dale sila mira buen ejemplo como maga Cristiano. Ya iscuji con el maga siervo ministerial por causa na diila maga buen calidad como maga Cristiano. Ta hace sila fuerte el diamon fe por medio na diila parte na miting. El diila buen ejemplo na trabajo predicacion mas ta anima kanamon queda activo na ministerio. El diila cooperacion na maga anciano ta puede contribui na alegria y unidad del congregacion. (Efeso 4:16) Si ta hace sila este, llega el tiempo hay queda tambien sila maga anciano.

• Cosa el maga calidad del maga siervo ministerial?

• Paquemodo ta ayudá el maga siervo ministerial para queda enbuenamente el andanza del congregacion?