Ngbangɔ fa se linɔ tɛ akɔli osɛ mɛ na kwa ti batangɔ bombi tɛ awa Kristo: “Abiazi na awa zangɔ na kwa.” (Filipɛ 1:1, NW) Fani sĩni, bombi kɔi ndo du na abiazi ná awa zangɔ na kwa ma wo ma. Kwa mɛ awa zangɔ na kwa ndo li la e ndo lwa mbana gɛrɛ lo ni nɛ?

Ala ndo za bombi tɛ abiazi. Awa zangɔ na kwa zu, apalanga nga na akangba na mangbi ti nzɔ̃ni na Yehova, na lo mɛ ya ala ndo li kwa bɛ la kɔi. Fani sĩni, ala ndo li angbondo kwa ndɛ ndɛ ndɛ ya kpale a ɔ na seni ka ya bombi. Ni ndo zi lége hɛ abiazi ya ala ngbã na kwa tɛ la ti hangɔ nga na batangɔ ayata.

Ala ndo li angbondo kwa. Ando to ambɛni awa zangɔ na kwa ya ala ngoro azi mɛ ndo ga bombi. Ambɛni ndo ba mikro, ambɛni ndo kangbi ambeti, ambɛni ndo bata faranga ti bombi, ambɛni ndo hɛ ayata ndo ti fangɔ na tɛnɛ. Ala ndo za nga na kwa ti lɛkɛngɔ Da Lo-lengɔ Gbia. Abiazi alengbi ti hũndangɔ ala ya ala za ayata ko la ati abange. Awa zangɔ na kwa ndo ye na bɛ la kɔi zangɔ na akwa ndɛ ndɛ ndɛ mɛ ndo hɛ la, ni la ayata ti bombi ndo hɛ la ndima.​—1 Timɔte 3:13.

Ala ndo fa lɛlo mɛ nzɔ̃ni. Ando hɛ kwa ti wa zangɔ na kwa hɛ ayata ko la na se liye ti nzɔ̃ni tɛ awa Kristo. Ngoi mɛ ala ndo du na tɛnɛ ka bombi ko, ala ndo kpengba na loyengɔ tɛ e. Lɛlo mɛ ala ndo fa na lége ti fangɔ tɛnɛ ndo dũ gégégé ge tɛrɛ e. Se ala li kwa na mangbi na bombi tɛ abiazi ko, na zingɔ lége ya bombi ti kɔi ko ayata alwa dengɔ bɛ. (Efɛzɛ 4:16) Wa semɛ na ngoi mɛ na gangɔ ko, ala lengbi ti tingɔ abiazi la.

• Awa zangɔ na kwa adu azi mɛ ngasia?

• Ye mɛ ala ndo li ti ya ko kwa dɔ nɔ̃ nzɔ̃ni ka ya bombi nɛ?