Qullaawu Maxaafi songote giddo looso uyineenna loossannoti lame gaamo noota kulanno; insano “cimeeyyetenna songote soqqamaanooti.” (Filiphisiyusi 1:1) Batinye songuwa giddo haammata cimeeyyenna songote soqqamaano no. Songote soqqamaano ninke kaaꞌlate maa maa loossanno?

Insa cimeeyye kaaꞌlitanno. Jajjabbuno ikko wedellu songote soqqamaano Yihowa ledo lubbote jaaloomi noonsareeti, ammanantinoreeti, hattono diinaggaabbe loossannoreeti. Insa addi addiha songote looso loossanno, hattono Gambooshshu Addaraashe gatamara lawinore loossanno. Tini qolte, cimeeyye hedonsa bebbeehantukki songo rosiissannonna towaattanno gede kaaꞌlitannonsa.

Insa babbaxxino looso loossanno. Mite songote soqqamaano gambooshshu yannara soqqantanno gede worranni. Wolootu qolte, qoonqote uduunne biddi assitanno, borrote kifilera loossanno, songonniha woxu mazigawa amaddanno, hattono songonniha soqqanshote qoqqowo biddi assitanno. Qolteno Gambooshshu Addaraashe gatamara kaaꞌlitanno. Cimeeyye, mite songote soqqamaano geerra roduuwa towaattanno gede wortara dandiitanno. Songote soqqamaano uyinanninsa looso baalanka maahoyye yite loossanno; loossanno loosi baalunkura ayirrinyu hasiisannonsa.—1 Ximootewosi 3:13.

Heedhanno heeshshonni dancha lawishsha ikkitanno. Songote soqqamaano shoommannihu danchu Kiristaanu akati noonsa daafiraati. Insa songote giddo shiqishshanno kifilla ammananke jawaachishshanno. Soqqanshoteno albisa ikkite, diinaggaambe soqqammeemmo gede kakkayissannonke. Cimeeyyete ledo sumuu yite loossanno daafira, hagiirrunna mittimma heedhanno gede assitanno. (Efesooni 4:16) Galte hossanni insano cimeeyye ikkate deerra martara dandiitanno.

• Songote soqqamaano hiittoo mannaati?

• Insa songo qinaabbinota ikkitanno gede kaaꞌlitannohu hiittoonniiti?