Библияда христиан хурал дээш сагыш салып чоруур ийи бөлүк эр улустуң дугайында бижээн — ол дээрге удуртукчулар болгаш дузалакчылар-дыр (Филипчилерге 1:1). Колдуунда хурал бүрүзүнде ындыг акылар бар. Хуралдың дузалакчылары чүнү кылып турарыл?

Олар удуртукчулар чөвүлелинге дузалажып турар. Хуралдың дузалакчылары — Бурганның күзелин күүседиринче чүткүлдүг, бүзүрелдиг эр улус-тур. Олар колдуунда хуралга хамаарышкан чугула ажылдарны кылып турар. Оларның ачызында удуртукчулар өөредилгеже болгаш «кадарар ажылче» кичээнгейни салып болур.

Олар дуза чедирип турар. Дузалакчыларның чамдыызы чурум хайгааракчылары кылдыр бараалгап, хуралче келген улусту уткуп, мендилеп турар. Өскелери аппаратура, дептерлер үлээри, хуралдың акша-төгерии болгаш суртаалдаар девискээрлер дээш харыылап турар. Оон ыңай олар Хурал залын арыг-силиг болгаш чогуур байдалга тудар дээш сагыш салып турар. Чамдыкта удуртукчулар дузалакчыларны назылай берген акы-угбаларга дузалажырын дилеп болур. Хуралдың дузалакчылары кандыг-даа хүлээлгелерни күүседип турза, оларның бараалгаарынга белени хүндүткеливиске төлептиг (1 Тимофейге 3:13).

Олар эки үлегер көргүзүп турар. Дузалакчылар кылдыр библейжи дүрүмнерни эки ажыглап өөренип алган эр улусту томуйлаар. Олар ужуражылга программазынга киржип тургаш, бистиң бүзүреливисти үргүлчү быжыктырарын кызып турар. Суртаал ажылын удуртуп тургаш, олар боттарының чүткүлдүг чоруу-биле бисти сорук киирип турар. Оларның удуртукчулар чөвүлели-биле кады демниг ажылдаарынга белени хуралдың өөрүшкүзүнге болгаш чаңгыс аай чоруунга салдарлыг (Эфесчилерге 4:16). Чоорту оларны хуралдың удуртукчулары кылдыр бараалгаарын сүмелеп болур.

• Хуралдың дузалакчылары дээрге кымнарыл ол?

• Хуралдың чурумнуг, чаңгыс аай ажылынга дузалакчыларның үлүү кандыгыл?