Baibulo jikusakolanga makuga gaŵili ga acalume ŵa Ciklistu ŵakusakamula masengo ga mumpingo. Makugaga gali, acakulungwa ŵa mumpingo, soni ŵakutumicila ŵakamucisya. (Afilipi 1:1) Ndaŵi syejinji mpingo uliwose ukusakola acalume ŵakutumicila pa mpingopo. Ana ŵakutumicila ŵakamucisya akusatukamulila masengo gambone gatuli?

Akusakamucisya likuga lya acakulungwa ŵa mumpingo. Ŵakutumicila ŵakamucisya ali ŵandu ŵakunonyela yausimu, ŵakulupicika, soni ŵamtawu, komboleka kuŵa acalume ŵacikulile kapena ŵacinyamata. Ndaŵi syejinji, jemanjaji akusakamula masengo gakusosekwa gakamucisya kuti yindu yine yijendeje cenene mumpingo. Yeleyi yikusakamucisya acakulungwa ŵa mumpingo kuti aŵiceje nganisyo mnope pa masengo gakwiganya, soni gakucinga.

Akusakamula masengo ga makono. Ŵakutumicila ŵakamucisya ŵane akusatumicila mpela akalinde kuti ŵapoceleje ŵandu ŵakwika pamisongano. Ŵane akusakamucisya pa yida yakwecesya maloŵe, kugaŵa mabuku, maakaunti ga mpingo, soni akusagaŵila mikuli jakulalicila kwa ŵandu mumpingo. Akusakamucisyasoni kulinganya mwamujonasice pa Nyumba ja Ucimwene. Acakulungwa ŵa mumpingo komboleka kwaŵenda jemanjaji kuti ŵakamucisyeje ŵacekulupe. Masengo galigose gaŵapele ŵakutumicila ŵakamucisya naga akugatenda mwakusacilila, ŵandu mumpingomo akusayacimila mnope.—1 Timoteo 3:13.

Akusalosya cisyasyo cambone mpela acalume ŵa Ciklistu. Ŵakutumicila ŵakamucisya akusasaguligwa ligongo lya ndamo syawo sya Ciklistu. Pakuŵeceta ngani pamisongano, akusalimbikasya cikulupi cetu. Cisyasyo cawo cambone pa masengo gakulalicila cikusatulimbikasya kuŵa ŵamtawu. Ligongo lyakola mtima wakamulanicika, akusatendekasya kuti kusengwa ni mkamulano yijendelecele. (Aefeso 4:16) Mkupita kwa ndaŵi, nombe nawo mpaka aŵe ŵakuŵajilwa kutumicila mpela acakulungwa ŵa mumpingo.

• Ana ŵakutumicila ŵakamucisya akusaŵa ŵandu ŵatuli?

• Ana ŵakutumicila ŵakamucisya akusakamucisya catuli kuti mpingo ujendeje cenene?