Betiledi ba Grikia be mato̱po̱ ońola Barnabas na ńamuloloma Paulo ka baboledi ba ebondo be ná, ba ta bape̱pe̱le̱ myemba o pond’abu. Ońola nje ba tano̱ ba bola nika e? Ońola ńo̱ng’abu ńa jongwane̱ kriste̱n ipe̱pe̱ na ńa bia ja labu la bwam. Paulo a kwali ná: “ese̱le̱ biso̱ jale pe̱te̱ o mindi me̱se̱” ná jombwe ne̱ni bonasango ba jaino̱. A ta be̱be̱ o dangwa bebwea ba kilometa o wala jembe̱ babo̱. (Bebolo 15:36) Baboledi ba ebondo ba we̱nge̱ pe̱ ba mabola ebol’abu na mu mulemlem ma ńo̱ngi.

Ba mapo̱ o jembe̱ biso̱. Muboled’a ebondo te̱ a mape̱pe̱le̱ be̱be̱ na 20 ma myemba. A matombise̱ woki po̱ na mwemba te̱ ngedi ibā ońola mbu. Je ná di tombwane̱ malea mabu na má bito babu yete̱na ba bai. Ba mawasa bia beso̱mbe̱ na badun o mwemba te̱, be pe̱ muńe̱nge̱ o die̱le̱ babo̱ o dikalo na o mokwa mabu ma Bibe̱l. Ba baboledi ba mape̱pe̱le̱ pe̱ bane̱ bonasango o jembe̱ babo̱, mwemba na batudu. Ba mabola pe̱ bekwali o ndongame̱n na mako̱to̱ne̱ ońola bwam basu.​—Bebolo 15:35

Ba mombwea bato be̱se̱. Baboledi ba ebondo ba mongwane̱ myemba o be̱ne̱ mulatako ma bwam na Loba. Ba mako̱to̱me̱ na batudu nikame̱ne̱ pe̱ na baboledi o kwalea ońola bońaki ba mwemba, na bola pe̱ babo̱ ngus’a malea o bia bambe̱ mbe̱ mabu o mwemba. Ba mongwane̱ pionie o tongwe̱le̱ dikalo labu. Be pe̱ muńe̱nge̱ o bia ba peńa oteten a mwemba na ne̱ni ba moano̱ o mudī. Ba bonasango ba mabola babo̱me̱ne̱ ka jabea ońola bwam ba bonasango abu. (2 Korinto 8:23) Di bupe̱ eyembilan a dube̱ na jemea l’abu.​—Bonahebe̱r 13:7.

• Ońola nje baboledi ba ebondo ba mape̱pe̱le̱no̱ myemba e?

• Ne̱ni weno̱ ná o tombwane̱ mape̱pe̱le̱ mabu e?