Deftere Allah nden no yewti fii Puulusa e Barnabaasi ko ɓe wonuno jindooɓe e aynooɓe mofte. Fii honɗun ɓe aynaynoo mofte ɗen ? Miijooji maɓɓe fow hari ko fii wallugol musiɓɓe maɓɓe gomɗinɓe. Puulusa wi’i : “ Yiltitoɗen, ndartoyen musiɓɓe ɓen [...] fii anndugol ko honno ɓe fewndori. ” (Kuuɗe sahaabaaɓe ɓen 15:36). Ɓe aamaano yahugol ka woɗɗi fii wallugol musiɓɓe maɓɓe ɓen. Ko sugu ɗun jindooɓe aynooɓe mofte woni e waɗude hannde.

Ɓe wallay men no men ɓeydira wakkilaare. Kala aynoowo nokkuure yahay nde laabi ɗiɗi e nder hitaande ka mofte ko yahata 20, o wona yontere e moftal kala. Waaju ko o jonnata men kon nafay men. E si mo jogii sonnaajo, on kadi jonnay men waaju ko wallata men. Hiɓe yiɗi anndindirgol e sukaaɓe e mawɓe. Hiɓe yiɗi kadi yaadugol e amen fii waajagol e fii jannugol yimɓe ɓen Deftere Allah nden. Ɓe waɗay pottital kamɓe e ardotooɓe ɓen ka moftal fii wallugol men no men ɓeydira wakkilaare. Waajagol maɓɓe ngol ka mofte e ka mottondire wallay men no men ɓadora Allah. — Kuuɗe sahaabaaɓe ɓen 15:35.

Hiɓe wattani yila e fow. Aynooɓe nokkuure no wattani yila e mo kala ka moftal fii no men wonira ɗoftiiɓe Allah. Ɓe yiiday e ardotooɓe ɓen e wallitotooɓe ɓen fii anndugol honno moftal ngal woniri e honno ngal woni yaarirde yeeso. E ɓe waajo fii mo kala yo ɓeydu wakkilaare e golle mun ɗen. Ɓe wallay waajotooɓe ɓen no ɓe ɓeydira wakkilaare fii waajagol e hiɓe yiɗi anndindirde e tuubuɓe ɓen e anndugol fii gomɗinal maɓɓe ngal. Mo kala e maɓɓe no baɲii gollude fii wallugol men (2 Korenti 8:23). Hiɗen haani jokkude misal maɓɓe ngal fii gomɗinal maɓɓe ngal e giggol maɓɓe ngol fii Allah. — Yahuudiyankeeɓe 13:7.

• Fii honɗun aynooɓe nokkuure yahanta ka mofte ?

• Ko honno yaadu maɓɓe ndun ka mofte nafirta men ?