E okioki mwaneweaia Barenaba ma te abotoro Bauro n te Koroboki ni Kristian ae Tabu n te Taetae ni Kuriiti. A beku naakai bwa mataniwi aika mwamwananga ao ni kakawari ekaretia ake rimoa. Bukin tera? A rangi n tabeakin raoi marurungin aia onimaki tariia. E taekinna Bauro bwa e kan “nako ni manga okiriia taari” ao n noriia bwa a uara. E kukurei n nakonako n te raroa ae bubua ma bubua te maire (kiromita) bwa e aonga ni kakorakoraia. (Mwakuri 15:36) Bon anne naba ae a kani kakaraoia ara mataniwi aika mwamwananga ni boong aikai.

A roko ibukini kaungaakira. E aki toki te mataniwi n te aono ae uarereke ni kakawari ekaretia aika 20 ke e raka riki, ao ni kabanea teuana te wiki iai uoua te tai n te ririki. Ti kona ni karekei kakabwaia aika bati man rongorongoia taari mwaane aikai ao mairouia buuia naba ngkana iai. A kakorakoraia ni kan atai raoi aroia rooro n rikirake ao kaara, ao a ingainga ni kan airi ma ngaira n te mwakuri ni minita ao nakoia naake ti reirei ma ngaiia n te Baibara. A iriia unimwaane mataniwi aikai ni kawariia taari ma ni kaungaia, ao a karaoi naba kabwarabwara aika kaungaunga ni bobotaki ma ruunga ibukini kakorakoraara.—Mwakuri 15:35.

A kaotiota mwannanoaia aomata ni kabane. A rangi n tabeakina riki marurungia ekaretia n te itera n taamnei, mataniwi n te aono ae uarereke. A boowi ma unimwaane ao tabonibai n te ekaretia ibukin norani mwin te rikirake ao n angania naba aia ibuobuoki ae manena ibukini karaoani mwiokoaia. A buokiia naba bwaiania bwa a na rikirake ni mwaatai n aia mwakuri ni minita ao a kukurei n ikikina ma kaain te ekaretia aika boou ao n ongoraea rikiraken aia onimaki. A kukurei taari mwaane aikai ni kabane n anga boni ngaiia bwa ‘raora ni mwakuri ibukini kabwaiara.’ (2 I-Korinto 8:23) Ti riai ni katotonga aia onimaki ao nanoia n tangira te Atua.—I-Ebera 13:7.

• Tera bukini kawaran ekaretia nako irouia mataniwi n te aono ae uarereke?

• Ko na kangaa ni kakabwaiaaki mani mwamwanangaia?