Omambo wOmbeibela nga tjangerwe mOtjigrike popengi ye hungira ohunga na Barnabas nomuapostele Paulus. Ovarumendu mba aave karere otjovatarere mbe ryangera ozombongo, nu aave ryangere ozombongo zoruveze rwawo. Omena ratjike? Owo tjiri aave rikendere komberukiro yOvakriste ovakwao. Paulus wa tja, eye aa vanga ‘okuyaruka ma katare ovakriste ovakwao’ kutja ve ri vi. Eye wa ri nonḓero yokutoora ouyenda wozokilometa omasere omengi kutja ma kayanḓiparise ovakwao. (Oviungura 15:36) Ovatarere mbe ryangera ozombongo ndino wina ve nonḓero otjingeyo.

Owo ve era okuyekutuyanḓiparisa. Omutarere auhe worukondwa u ryangera ozombongo ape 20 poo nao, nu u ryangera ombongo aihe ovikando vivari mombura na kara otjivike otjimbomba pu nombongo aihe. Eṱe matu yenene okumuna ouwa tjinene okuza kondjiviro yovarumendu mba, nu tji va kupa matu munu ouwa okuza kondjiviro yovakazendu vawo wina. Owo ve kondjisa okutjiwa ovandu avehe, ovaṱiṱi novanene, nu ve nonḓero yokuungura puna eṱe motjiungura tjokuzuvarisa nokuhakaena kuna ovandu mbu tu rihonga pamwe Ombeibela. Ovatarere mba ve ungura puna ovanene vombongo okutuvarura, nu ve tu pa omahungi omayanḓiparise pozombongarero na pomaworonganeno omanene.​—Oviungura 15:35.

Owo ve nonḓero movandu avehe. Ovaterere vorukondwa ve nonḓero tjinene momberukiro yozombongo. Owo ve hakaena ku novanene novavatere vombongo okutara komekuriro wombongo nokuvepa omirari ohunga nomuano wokutjinda omerizirira wawo. Owo ve vatera ovakandjira okukara nondoṋeno moviungura vyawo vyokuzuvarisa, nu ve tjaterwa okutjiwa ovandu ovape mombongo nokuzuva ohunga nomuano mbu ve kura mongamburiro. Auhe wovarumendu mba u riyandjera omuini ‘otjomuungure wapamwe na eṱe okutuvatera.’ (2 Ovakorinte 8:23) Eṱe matu sokuhorera ongamburiro yawo nouṱakame wawo mu Mukuru.​—Ovaheberi 13:7.

• Ongwaye ovaterere vorukondwa tji ve varura ozombongo?

• Eṱe matu yenene vi okumuna ouwa indu tji ve yekuvarura ombongo yetu?