ILINNIAGASSAQ 17
Ilagiinnik nakkutilliisut qanoq ikiortarpaatigut?
Malawi
Angalaaqatigiittartut
Oqaluussisut
Utoqqaanertat ataatsimiittut
Paulusi Barnabalu Kristumiut Allagaataanni Grækerisuuni eqqaaneqarajupput. Angutit taakku ilagiinnik nakkutilliisutut kiffartorput ilagiinnut kristumiunut siullernut tikeraartarlutik. Sooq? Anersaakkut qatanngutimik ingerlalluarnissaat ilumoorlutik soqutigigamikku. Paulusip qatanngutit qanoq innersut takusarlugit ‘tikeraarusunnerarpai’. Nakussatsikkiartorumallugit kilometerit hundredillit angalajumavoq. (Apustilit Suliaat 15:36) Ullumikkuttaaq ilagiinnik nakkutilliisut taamaaliortarusupput.
Qiimmassarniarluta tikeraartarput. Ilagiinnik nakkutilliisoq ilagiinnut 20-t missaanniittunut tikeraartarpoq taakkulu tamaasa immikkut ukiumut marloriarluni sapaatip-akunnerani najortarlugit. Qatanngutit angutit taakkua misilittagaat, nuliaqarpatalu nuliaasa misilittagaat, ilinniarfigilluarsinnaavavut. Inuusuttunik utoqqarnillu ilisarisimannillualerniartarput, aamma nalunaajaajartoqatigerusuttorujussuusarpaatigut Biibilimillu atuaqqissaaqateqariartortugut ilagerusuttarluta. Nakkutilliisut taakku utoqqaanertat paarsisutut pulaaqatigisarpaat, nakussatsikkumallutalu ataatsimiinnerni ataatsimeersuarnernilu qiimmaallannartunik oqalugiaateqartarput. – Apustilit Suliaat 15:35.
Kikkut tamaasa inuttut soqutigisarpaat. Ilagiinnik nakkutilliisut ilagiit anersaakkut peqqissusiannik soqutiginnilluinnartuupput. Utoqqaanertanik ilagiinnilu kiffartortunik ataatsimeeqateqartarput ilagiit qanoq innerat paasiniarlugu. Aamma taakkua suliassaminnik qanoq isumaginnissinnaanerat pillugu atoriaannaasunik siunnersortarpaat. Pionerit oqaluussillaqqinneruleqqullugit ikiortarpaat, aamma ilagiinnut ilannguterlaat ilisarisimallualerusuttarpaat anersaakkullu qanoq siumukarsimanerminnik oqaluttuartut tusarusuttarlugu. Qatanngutit taakku tamarmik immikkut kajumillutik imminut pilliutigalutillu uagut iluaqutissatsinnut ‘suleqataasarput’. (2 Korinthimiut 8:23) Taakkua uppernerat Guutimullu tunniusimanerat ilaartariaqarparput. – Hebræerit 13:7.
-
Ilagiinnik nakkutilliisut suna siunertaralugu ilagiinnut tikeraartarpat?
-
Taakkua tikeraarnerat illit qanoq iluaqutigisinnaaviuk?