Nkumbu miayingi e Sono ya Kingerekia ya Kikristu iyikanga Banaba yo Paulu wa ntumwa. Ampangi awaya bakangalanga mu kwenda kingula e nkutakani muna tandu kiantete. Ekuma? Batokanenanga wete dia mpangi zau za mwanda. Paulu wavova vo nzolele ‘vutuka wau, yakingula wana-ngudi’ yazaya kana aweyi bena. Wakangalanga kilometa zayingi mu kwenda kumika ampangi zandi. (Mavangu 15:36) E diadi i kani bekalanga diau akengi a zunga o unu.

Bekutukasakesanga. Konso nkengi a zunga, tezo kia 20 ma nkutakani kekingulanga, lumingu lumosi kevanganga muna konso nkutakani yo kingula yo nkumbu miole muna mvu. Tulenda baka nluta miayingi muna salu kiambote besalanga ampangi awaya kumosi y’akazi au. Akengi awaya kumosi y’akazi au bevavang’o zaya konso muntu muna nkutakani, aleke ye ambuta, beyangalelanga mpe kwenda yeto muna salu kia umbangi ye vava tukwendanga longoka Nkand’a Nzambi yo wantu. Akengi awaya kumosi y’akuluntu, besalanga e salu kia kingula yo vungula ekambi. Befilanga malongi mekutukumikanga muna nkutakani zeto ye muna tukutakanu twampwena.​—Mavangu 15:35.

Wete dia mpangi zawonso betokanenanga. Akengi a zunga wete dia nkutakani betokanenanga. Bekutakananga y’akuluntu kumosi ye selo ya salu muna zaya o lunungunuku lwau yo kubavana luludiku lwamfunu muna lenda lungisa kiyekwa kiau. Besadisanga aviti a nzila mu toma sala e salu kiau yo sia e sungididi kwa wantu ampa bekwizanga muna nkutakani ye kubasadisa mu nungunuka muna mwanda. Ampangi awaya bekuyivananga kuna mvevo nze ‘asadi akw’eto muna wete dieto.’ (2 Korinto 8:23) Tufwete tanginina lukwikilu yo vumi wau muna Nzambi.​—Ayibere 13:7.

• Ekuma akengi a zunga bekingulwilanga e nkutakani?

• Nkia nluta olenda baka muna nkingula au?