Amasimbo ghakunena ivya Balanabasi nu mutumiwa u Pabuli. Abanavuli aba bobo bakendelagha ivipanga ivyabwandilo. Chifukwa buli? Bakapasikizyanga ubumi uwabuzimu ubwa Bakilisitu abamwabo. U Pabuli akanena ukuti “zagha tunyokele nukubendela abakamu bitu” sona twennye mumo bakwikalila. Akalondiwa ukwenda ubulendo ubutali ukuti aye aghomye abamwabo. (Imbombo 15.36) Bo bakwendela ivipanga amasiku ghano bope vyovyo bakubomba.

Bakutughomya. Uwakwendela ivipanga akwendela ivipanga ivyakupululila 20. Ichipanga choka akwendela amasabata ghabili pa mwaka. Tungapindulako ku bakamu aba na ku bachi babo nanti basendite mo bakumanyisizya. Bakwiyipa ukumanya umuntu aliwesi, umunandi nu songo bulo. Bakulonda he ukuti bende nuswe mu bulumbilili naku bo tukumanyila nabo Ibayibolo. Abakwendela ivipanga bakwenda poka na basongo abachipanga pakwendela abakamu na bayemba ukuti babaghomye. Pa nkomano izya chipanga ninkulu bakunena inkani zyo zikutughomya.—Imbombo 15.35.

Bakwinong’onela umuntu aliwesi. Abakwendela ivipanga bakuba ni nyota iyakumanya mo ichipanga chikwendela. Bakukumana na basongo na bavwilizi ukuti bennye mo ichipanga chikwendela sona nukubamanyisya mo bangabombela imbombo yabo. Bakubavwa abapayiniya mo bangakwanisizya ubulumbilili. Abakwendela ivipanga bakuba bakuhoboka pakumanya ukuti bo banda lunulu ukukomana bakukula mwabuzimu. Uwakwendela ivipanga aliwesi akuba ngati ‘wambombo uwamwitu.’ (2 Aba Kolinti 8.23) Tungeghelela ulusubilo lwabo sona nu kwiyipa kwabo.—Aba Hebeli 13.7.

• Choni cho abakwendela ivipanga bakutwendela?

• Ka tungabomba ichoni ukuti twize tupindule nanti biza?