ບົດທີ 17
ຜູ້ດູແລໝວດຊ່ວຍເຫຼືອເຮົາແນວໃດ?
ມາລາວີ
ການປະຊຸມກ່ອນອອກປະກາດ
ການປະກາດ
ການປະຊຸມຜູ້ເຖົ້າແກ່
ພະຄຳພີພາກພາສາເກັຣກກ່າວເຖິງບານາບາແລະອັກຄະສາວົກໂປໂລເລື້ອຍ ໆ. ຊາຍສອງຄົນນີ້ຮັບໃຊ້ໃນຖານະເປັນຜູ້ດູແລໝວດ ຢ້ຽມຢາມປະຊາຄົມຕ່າງ ໆ ໃນສະໄໝສະຕະວັດທຳອິດ. ເປັນຫຍັງຈຶ່ງໄປຢ້ຽມຢາມ? ເຂົາເຈົ້າເປັນຫ່ວງຢ່າງແທ້ຈິງຕໍ່ຄວາມຢູ່ເຢັນເປັນສຸກຂອງພີ່ນ້ອງຮ່ວມຄວາມເຊື່ອ. ໂປໂລກ່າວວ່າລາວຢາກ “ຫຼົບໄປຢາມພີ່ນ້ອງທັງຫຼາຍ” ເພື່ອເບິ່ງວ່າເຂົາເຈົ້າເປັນແນວໃດ. ລາວເຕັມໃຈເດີນທາງຫຼາຍຮ້ອຍກິໂລແມັດເພື່ອໄປແລະເສີມກຳລັງພີ່ນ້ອງ. (ກິດຈະການ 15:36) ນັ້ນຄືຄວາມປາຖະໜາທີ່ຜູ້ດູແລໝວດຂອງເຮົາມີໃນທຸກມື້ນີ້.
ເຂົາເຈົ້າມາເພື່ອໜູນກຳລັງໃຈພວກເຮົາ. ປີລະສອງຄັ້ງ ຜູ້ດູແລໝວດແຕ່ລະຄົນຢ້ຽມຢາມປະມານ 20 ປະຊາຄົມ ແລະໃຊ້ເວລາອາທິດໜຶ່ງກັບແຕ່ລະປະຊາຄົມ. ພວກເຮົາສາມາດໄດ້ຮັບປະໂຫຍດຢ່າງຫຼວງຫຼາຍຈາກປະສົບການຂອງພີ່ນ້ອງຊາຍເຫຼົ່ານີ້ ແລະຖ້າເຂົາເຈົ້າແຕ່ງດອງ ພວກເຮົາກໍຈະໄດ້ປະສົບການຈາກເມຍຂອງເຂົາເຈົ້າເຊັ່ນກັນ. ຜູ້ດູແລໝວດແລະເມຍພະຍາຍາມທີ່ຈະຮູ້ຈັກກັບທັງຄົນໜຸ່ມແລະຄົນສູງອາຍຸ ແລະເຂົາເຈົ້າປະສົງຢ່າງຍິ່ງທີ່ຈະໄປກັບພວກເຮົາໃນງານປະກາດແລະໃນການສຶກສາຄຳພີໄບເບິນ. ຜູ້ດູແລເຫຼົ່ານີ້ເຮັດການບຳລຸງລ້ຽງຮ່ວມກັບຜູ້ເຖົ້າແກ່ ແລະຍັງໃຫ້ຄຳບັນລະຍາຍຢູ່ການປະຊຸມປະຈຳປະຊາຄົມແລະໃນການປະຊຸມໃຫຍ່ເຊິ່ງໜູນກຳລັງໃຈແລະເຮັດໃຫ້ເຮົາເຂັ້ມແຂງ.—ກິດຈະການ 15:35
ເຂົາເຈົ້າສົນໃຈໃນທຸກຄົນ. ຜູ້ດູແລໝວດສົນໃຈຢ່າງຍິ່ງໃນສຳພັນທະພາບຂອງປະຊາຄົມກັບພະເຢໂຫວາ. ຜູ້ດູແລໝວດປະຊຸມກັບຜູ້ເຖົ້າແກ່ແລະຜູ້ຊ່ວຍງານຮັບໃຊ້ເພື່ອເບິ່ງຄວາມກ້າວໜ້າແລະໃຫ້ຄຳແນະນຳທີ່ໃຊ້ໄດ້ແທ້ໃນການຮັບມືກັບຄວາມຮັບຜິດຊອບຕ່າງ ໆ. ເຂົາເຈົ້າຊ່ວຍໄພໂອເນຍໃຫ້ປະສົບຜົນສຳເລັດໃນວຽກຮັບໃຊ້ຂອງຕົນ ແລະເຂົາເຈົ້າຍິນດີທີ່ໄດ້ຮູ້ຈັກກັບສະມາຊິກໃໝ່ຂອງປະຊາຄົມແລະຮັບຮູ້ເຖິງຄວາມກ້າວໜ້າໃນການສຶກສາພະຄຳພີຂອງຄົນເຫຼົ່ານັ້ນ. ພີ່ນ້ອງຊາຍເຫຼົ່ານີ້ແຕ່ລະຄົນເສຍສະລະຕົວເອງໃນຖານະ “ເປັນເພື່ອນກະທຳການດ້ວຍກັນສຳລັບ [ປະໂຫຍດຂອງເຮົາ].” (2 ໂກລິນໂທ 8:23) ພວກເຮົາຄວນຮຽນແບບໃນຄວາມເຊື່ອແລະຄວາມເຫຼື້ອມໃສຕໍ່ພະເຈົ້າຂອງເຂົາເຈົ້າ.—ເຫບເລີ 13:7
-
ຜູ້ດູແລໝວດໄປຢ້ຽມຢາມປະຊາຄົມຕ່າງ ໆ ເພື່ອຈຸດປະສົງຫຍັງ?
-
ເຮົາຈະໄດ້ຮັບປະໂຫຍດຈາກການຢ້ຽມຢາມຂອງເຂົາເຈົ້າແນວໃດ?
