Keristani Grik Revarevadia ese Banaba bona aposetolo Paulo na e herevalaidia momo. Idia na guna e nohova kongrigeisen idau-idau e vadivadidiava. Dahaka dainai? Badina kongrigeisen taudia edia namo e laloa badava. Paulo eto, ia na e urava baine lou lao bona ‘varavarana baine ha itadia,’ idia be ede heto. Momokani, e urava bainela idia baine hagoadadia, herevana kilomita hida baine laolao. (Kara 15:36) Emai seket e nariamu taudia danu unu e kara tomamu.

Ihagoadamai e maimu. Laḡani ta ta iboudiai seket e nariamu taudia ta ta na nega rua kongrigeisen 20 o momo e vadivadidiamu. Una neganai, idia ida wiki ta lalonai e ḡaukara heboumu. Unu tadikaka amo ḡau momo baita dibamu—bema e headava, edia hahine amo ḡau momo baita dibamu danu. Idia na e uramu kongrigeisen taudia—maraḡina amo ela burukana—bae dibadia, bona e uramu haroro bona Baibel stadi ai bae bamomai. Idia na elda ida kongrigeisen taudia haida e vadivadidiamu, bona hebou maraḡidia bona badadia lalodiai e henimu tok idau-idau amo e hagoadamaimu.—Kara 15:35.

Iboumai e lalomaimu. Seket e nariamu taudia na kongrigeisen ena namo e laloa badamu. Elda bona hesiai taudia ida e heboumu neganai, kongrigeisen ena tubu karana bona tadikaka ese maduna bae hua daladia e herevalaimu. Danu, painia taudia e durudiamu, edia hesiai ḡaukara bae goadalaia totona. Bona e uramu bae diba, kongrigeisen e bamoa matamamu taudia e goadamu eiava. Unu tadikaka na sibodia edia namo se tahumu, to ‘ai daimai ai e ḡaukaramu.’ (2 Korinto 8:23) Edia abidadama bona Dirava ibadinana karadia baita tohotoho na namo.—Heberu 13:7.

• Dahaka dainai seket e nariamu taudia ese kongrigeisen e vadivadidiamu?

• Edia vadivadi amo dahaka namo ba davari diba?