Baaboa ye a bɛ̃ɛ̃ e kɛa Gili We yia, e wɔ̃ gee kpokpo ɓo e gbɛ̃a Banaba wa Pɔɔ o mɔ. Gɔ̃a o kea o kɛ nukielaa lagɛ̃-mia ka, waa lo ɓɔa si o leege vɔ lɛ o kɛ mɔ́ nukielaa yia pie. Mɛɛ wa mɔɔ a kɛ ɓo kili? O leege Walamia wa Wala wɔ̃ kɛɛɛ kpaa e kɛ kpokpo ɓo o mɔ. Pɔɔ a gee laa naa ‘o lo o mɛi o lo ɓɔɔ o leege vɔ pie’ o zi lɛ o a ka gbaa dɔ. A zo wee e kɛa mɔ e taa zi kpala gbekeni pie luo bunuzɛ mɔ kɛ e lo aa e leege Walamia fãawaa. (Apɔsɔlɔ 15:36) Wɔ̃ nɔ dooa lɛ e ko nukiela ni lɛ o kpo doo yia lagɛ̃-mia zo mɔ pɛnɛɛ.

Oo nu kɛ ó ko fãawaa. Nukiela ni lɛ o kpo doo yia lagɛ̃-mi lɛɛ ɓɔ nukiela ni lɛ o kelɛ 20 (vũ peelɛ) lɛ ɓea pie doo doo kpola peelɛ kɛɛ doo yi. Wɔ̃ miaa wa o na ni, e kea lee lɛ o piea, waà diea yia lɛɛ gbũ ko mɔ kpokpo ɓo. Oo dɔ gaga ó mia seĩ dɔ, e kɛ bɛ̃ɛ̃ mia dɛɛ wa mia kolokolo kaa ka. Oo naa kpokpo ɓo o gbɛ̃ ko pie kɔaa lo wɔ̃ laũ yiea geea si, ɛ̃ɛ̃ mia lɛ ko Baabo zɔ̃ɔ̃ o lɛɛ pie. Mia lagɛ̃-mia o kea oo da mia diedie-vɔɔ ba waa ɓɔ ko pie kɛɛ ó ko mɛ kɛ gaga. Oo ko fãawaa we gee Baabo yi wɔ̃ lɛ o gee pakiemɔ ni yia ka.​—Apɔsɔlɔ 15:35.

Oo zɔ̃ɔ̃ kelɛ ko seĩ ko mɔɔ wɔ̃ kpaa lɛ o mɔ. Lɛ zi nukiela nia wa Wala wɔ̃ kɛkɔ lɛ a kaa kpaa kpokpo lɛ ko lagɛ̃-miaa mɔ. Oo pakiemɔ ɓeĩ kũ mia diedie-vɔɔ wa gbũ Walamia mɔ mia ni ka kɛ ó zi wɔ̃ lɛ kɛpia a ka nukielaa yia dɔ, ɛ̃ɛ̃ kɛ o gbumɔ nɔ o lɛɛ e gbɛ̃a zi laa mɔ o yɛɓo kɛaa mɔ. Oo gbũ wɔ̃ laũ yie gee teele mia mɔ o wa wɔ̃ laũ yie gee yɛɓoa kɛ sɛ. O zo ge lɛɛ li kɛɛ o mia ye o da ko ba dɛɛ dɔ, ɛ̃ɛ̃ kɛ o zi o faapiaa wa Wala wɔ̃ mɛdãã yia wɔ̃ ma. Ko leege vɔ o kea oo o die nɔ deĩ le kɛ ó kɛ ‘ko ɓɛɛ lɛ ko ye ko yɛɓo kɛ e kie la kɛ o gbũ a ka ko mɔɔ ka.’ (2 Kɔleĩtĩa 8:23) Laa mɔ kɔa wa zodɔamɔ ɛ̃ɛ̃ wa die nɔ Wala lɛɛ yɛɓo kɛkɔɔ pie gɔ̃.​—Hiibulu 13:7.

• Mɛ Sɛki Lagɛ̃-mia o mɔɔ nu ɓo ɓɔlɔũkɛɛ?

• Zi kpɛɛ lɛ i gbumɔ sɔlɔɓoa wa ɓɔlɔũkɛɛ kolola?