Грек йылме дене возымо христианысе Возымашыште (тудым эше У Сугынь маныт) Варнава ден апостол Павел нерген чӱчкыдын ойлалтеш. Нине пӧръеҥ эскерыше иза семын служитленыт. Нуно ту жапыште чумырымо чыла христианысе погынымашыш миеденыт. Молан? Христианысе иза-шольышт-влакын чыла сай лийже манын, нуно уло чон дене тыршеныт. Икана Павел Варнавалан тыге каласен: «Иза-шольо-влак деке ынде угыч каена да, кузе илат, ончалына». Иза-ака-влакым пеҥгыдемдаш манын, Павел кужу корным эрташ ямде лийын (Апост. пашашт 15:36). Мемнан кечылаште районым эскерыше иза-влак тыгаяк кумылым ончыктат.

Нуно мемнам пеҥгыдемдаш толыт. Районым эскерыше кажне иза талуклан кок гана иктаж 20 погынымашыш мия (тиде ик район) да кажне погынымашыште ик арням эртара. Нине опытан изан туныктымашышт мыланна кугу пайдам конда. Изан ватыже уло гын, тудын примержат мемнам шукылан туныкта. Нуно погынымашыште чылашт денат палыме лияш тыршат. Тыгак нуно мемнан дене пырля пӧрт еда таныклен коштыт да библийысе шымлымаш-влакым эртараш полшат. Мемнам лыпландараш да пеҥгыдемдаш манын, районым эскерыше иза кугурак иза дене пырля мӧҥгышкына толын кертеш. А вашлиймаш ден конгресс годым тудо кумылаҥдыше ойлымаш дене лектеш (Апост. пашашт 15:35).

Нуно кажне иза-ака верч тыршат. Районым эскерыше иза-влакын цельышт — кажне погынымашлан Иеговалан ӱшанле лийын кодаш полшаш. Сандене районым эскерыше иза кугурак иза да служебный полышкалыше-влак дене эше посна вашлиеш. Тудо пален налеш, могай кӱкшытыш погынымаш шуын, да кӱлешан каҥашым пуа. Тыгак тудо пионер-влаклан служенийыштым саемдаш полша, у иза-ака-влак дене палыме лияш тырша да нуно чын корнышто могай сеҥымашыш шуыныт пален налеш. Мыланна сай лийже манын, районым эскерыше иза-влак вий ден жапыштым чаманыде полшаш эре ямде улыт (2 Коринфян-влаклан 8:23). Нунын ӱшанымашышт да Юмылан ӱшанле улмышт мыланна сай пример (Еврей-влаклан 13:7).

• Могай цель дене районым эскерыше иза-влак кажне погынымашыш миедат?

• Нунын толмышт тыланда кузе полшен кертеш?