Itech tajkuilolmej tein moajsij itech Escrituras Griegas Cristianas semi ika motajtoua Bernabé uan tatitanil Pablo. Nejin takamej katkaj takalpanouanij uan yayaj kinitatij nechikolmej itech nejon tonalmej. ¿Keyej ijkon kichiuayaj? Porin kinekiaj maj kuali yetokan ininikniuan akin pouiaj itech inintaneltokalis. Pablo kijtoj ke kinekia oksepa kinkalpanos uan ijkon kimatis keniuj yetoyaj. Itanejnekilis katka kinyolchikauas maski tel miak kilómetro monekia yas (Hechos 15:36). Axkan tokniuan takalpanouanij no ijkon kichiuaj.

Techyolchikauakij. Sejse tokniuj takalpanojkej itech circuito kinita kemej veinte nechikolmej uan ojpa xiuit yetok se semana itech sejse nechikol. Uelis techtelpaleuis ininneskayo nejin tokniuan uan ininnamik, komo kipiaj. Yejuan mochikauaj kinixmatiskej akin telpochmejok uan akin xiuejkejya, uan yolpakij touan tanojnotsaskej uan kinkalpanoskej taltikpakneminij akin tikinmachtijtokej ika Biblia. Nejin tokniuan takalpanouanij iniuan tayekananij itech nechikol kinyolchikauatij okseki tokniuan; uan no, techyolchikauaj keman kitemakaj tel kuali tanojnotsmej itech nechikolmej uan itech uejueyi nechikolmej (Hechos 15:35).

Ininka motekipachouaj nochin. Tokniuan takalpanouanij itech circuito motekipachouaj maj akin pouij itech nechikolmej kuali kipiakan inintakuaujtamatilis iuan Dios. Monechikouaj iniuan tayekananij uan tapaleuianij uan kiitaj kuali tekit tein mochiuak uan kinmakaj tayolmajxitilis tein kinpaleuis maj okachi kuali kichiuakan inintekiuj. Kinpaleuiaj akin kichiuaj tekit kemej precursor maj okachi kuali tekitikan, uan yolpakij kinixmatiskej taltikpakneminij akin yekin peuaj touan monechikouaj uan no porin kimatij ke kiiskaltijtokej inintakuaujtamatilis iuan Dios. Sejsemej nejin tokniuan senkis motemakaj tekititinemiskej uan ijkon techpaleuiskej (2 Corintios 8:23). Maj no titakuaujtamatikan uan maj tikueyichiuakan Dios kemej yejuan (Hebreos 13:7).

• ¿Keyej kinkalpanouaj nechikolmej tokniuan takalpanouanij itech circuito?

• ¿Keniuj uelis tejuatsin tikonselis nepaleuil keman takalpanouaj nejon tokniuan?