Matahwa o ciGiriki o ciKristu kazinji anonanga ngo pa musoro pa Bharnabha na mupostori Pauro. Vanarume ava vakashandira inga vavonereri vanofambira, vecibvakacira ungano jo kutanga. Ngenyi? Ivona zvokadi-kadi vaibatikana ngo pa musoro po uhomi hwo ku mujimu hwo hama. Pauro wakananga kuti, waida ‘kufambirabze hama’ kuti oovona magariro ovakaita. Iyena wainga no cido co kuita hwendo hwo mazana o ma (km) kuitira kwenda ko vavangisa. (Maitiro o Vapostori 15:36) Nyamasi, ici ndicona cido co vavonereri vedu vanofambira.

Ivona vanovia kuzotivangisa. Muvonereri wo ndharaunda umwe na umwe anofambira ungano jinokhwedera 20, kaviri pa gore. Pa ungano imwe nga imwe anopeja bviki. Itusu tingabeseka maningi ngo zviito zvo hama iji no vakaji vavo, kudari vakarovora. Ivona vanoita simba ro kuziva vadoko no vasharuka zve vanodisisa kuti vavaperekeje mu basa ro mu munda no ku vajiji vo Bhaibheri. Vavonereri ava vanohavisa pamwepo no vakuru, zve kuti vativangise, vanoita hurukuro jinovangisa mu musongano no mu magungano o ndharaundha.—Maitiro o Vapostori 15:35.

Ivona vanodakarira hama jese. Vavonereri vo ndharaunda vanodakarira ngo mwoyo wese mugariro wo mujimu wo ungano. Ivona vanosongana no vakuru zve vabati vanoshandira kuti vavonezve kufambira mberi kwakaithwa zve vovapa mazano anoshanda kungwarira mutoro javo. Ivona vanobesera mapiona kuti abudirire mu basa rao ro kucumaera, zve vanodakarira kuziva vapsa vari kusonganirana zve kukura kwavo ku mujimu. Umwe na umwe wo hama iji mu kusujunuka kwese anojipira inga ‘mudoni wedu anobatira basa’. (2 VaKorinto 8:23) Itusu tinodikana kutevejera rutendo hwavo zve kunamata kwavo Mwari ngo mwoyo wese.—Vaheberi 13:7.

• Ngo capi cidisiso co kubvakacira ko vavonereri vo ndharaunda mu ungano?

• Mungabesereswa kudini ngo kubvakacira kwavo?