Pan las Escrituras Griegas Cristianas miak biáj tajtowa de Bernabé wan del apóstol Pablo. Ini̱nmej tajta̱gamej yajkij tayaka̱naj yej kipaxa̱lowilia̱yaj tanechko̱lismej de inó̱n tiempoj. ¿Té íga kichi̱wayaj iní̱n? Iga kinekiáj maye̱ʼonokan iyikni̱wan. Pablo kijtoj iga seuʼ biáj kipaxa̱lowilisnekiá iyikni̱wan iga kitasnekiá kén onoyaj. Aunke nejnemiá pux wejka, yéj ya̱snekiá iga makiyo̱lketsati iyikni̱wan (Hechos 15:36). A̱man, ini̱nsan no̱ kinekij makichi̱wakan yej tayaka̱naj de circuito.

Wi̱tsej iga te̱yolketsaj. Yej tayaka̱naj de circuito kipaxa̱lowiliáj veinte tanechko̱lismej wan o̱me biáj pan xiwiʼ kipaxa̱lowiliáj se̱ semana cada tanechko̱lis. Welij te̱pale̱wiá itane̱xtilismej de ini̱nmej tokni̱wan wan de isiwa̱tkej, siga na̱miktitokej. Yejeme̱n motekitiliáj iga maki̱xmatikan chokomej wan yej wewejtsitsin, wan kinekij iga iwan matitajto̱lmoya̱wakan wan matikpaxa̱lowili̱tij yej tikmachtiáj. Ini̱nmej tayaka̱naj de circuito yawij wan tayaka̱naj de tanechko̱lis iga makipaxa̱lowili̱tij sekin tokni̱wan. Kipano̱ltiáj ye̱kti discursos pan tanechko̱lis wan pan weyi tanechko̱lis yej te̱yolketsaj (Hechos 15:35).

Moyo̱lmiktiáj iga nochimej. Yej tayaka̱naj de circuito moyo̱lmiktiáj iga tanechko̱lismej maye̱ʼonokan espiritualmente. Monechkowaj wan yej tayaka̱naj wan los siervos ministeriales iga makitakan te̱ yej ye̱kti kichijkej pan tanechko̱lis wan kine̱xtiliá kén wel kichi̱waj ma̱j ye̱kti itekipanolismej. Kipale̱wiá los precursores iga ma̱j ye̱kti matajto̱lmoya̱wakan wan ijkó̱n wel makipale̱wi̱kan seuʼmej, wan no̱ pa̱kij kua̱ ki̱xmatij yej nemi monechkowaj wan tejeme̱n wan kua̱ kimatij iga ini̱nmej nemi weyaj espiritualmente. Ini̱nmej tokni̱wan pux motekitiliáj wan te̱pale̱wiáj iga matiye̱onokan (2 Corintios 8:23). Ijko̱nsan no̱ matikne̱xtikan iga tikpiáj fe wan matikweymakakan Dios ken yejeme̱n kichi̱waj (Hebreos 13:7).

• ¿Té íga yej tayaka̱naj de circuito kipaxa̱lowiliáj tanechko̱lismej?

• ¿Kén wel mitspale̱wiá kua̱ te̱paxa̱lowiliá yej tayaka̱na de circuito?