God Bizaad Gríikjí saad bee akʼeʼeshchínígíí éí tʼáá ahą́ą́h Bárnabas dóó Paul yilʼaadii yaa chʼínáháʼááh. Díí hastóí kʼidéezʼı̨́įʼgo áłah nídaʼadleeh yę́ę yitah nídítʼaash ńtʼééʼ. Éí haʼátʼíí biniyé? Paul dabikʼisóó yéigo yaah bíniʼgo biniinaa Bárnabas kóbizhdííniid, “tʼą́ą́ʼ nídiitʼashgo nihikʼisóó danilíinii haa daatʼı̨́į shaʼshin, éí nihił bééhodoozįįł.” Tʼáá hó íizhnízingo daashı̨́ı̨́ danízáádgóó dahakʼis bitah nízhdídáahgo bidaʼoodląʼ dabidziilgo ánídajiiłʼįįh ńtʼééʼ. (Acts 15:36) Dííshjı̨́įdi hastóí nihikʼidadéezʼı̨́įʼgo nihitah nídadikahígíí ałdóʼ tʼáá ákótʼéego nihaa dabíniʼ.

Chánah áńdanhoodlííł biniyé nihitah nídaakah. Circuit overseer wolyéhígíí éí naadiin dóó baʼaan áłah nídaʼadleehgóó yikʼidéezʼı̨́ı̨́ʼ biniyé yitah ahénínádááh. Éí naakidi tʼáá nináháhááh bikʼeh łaʼ damóojįʼ łaʼ yił hólǫ́ǫ łeh. Díí hastóí bitsʼą́ą́dóó ídahwidiilʼááł, daʼayéehgo éí bichʼooní ałdóʼ bitsʼą́ą́dóó ídahwidiilʼááł. Éí tʼáá ájíłah tʼáá ałtso bił ahéédahodiilzįįł nízin. Áádóó hootahgóó nidahwiilneʼígíí dóó łaʼ ndaniitinígíí nihee hólǫ́ǫgo ákǫ́ǫ́ nihá yíneedlı̨́įgo nihił nídadikah. Díí tʼáá áłah hastóí éí oodlání yá naazíinii yichʼįʼ háádaadzihgo yaa ádahalyą́. Áádóó áłah nídaʼadleehgóó nihił nídahalnihgo nihedaʼoodląʼ daniłdzilgo yee chánah ádanihileʼ.​—Acts 15:35.

Tʼááʼáníiltso nihaa nitsídaakees. Circuit Overseer daolyéhígíí éí áłah nídaʼadleehgóó diyin kʼehgo áhootʼéhígi íiyisíí yaa nitsídaakees. Oodlání yá naazíinii dóó ndaalʼaʼí ádabiʼdiilyaaígíí yił ahínéekahgo łaʼ daalyaaígíí yił nídeenílʼįįh. Áádóó bindaanish bąąh naazláhígíí hazhóʼó ádeidoolíłígi yee yíká anídaajah. Alą́ąjįʼ ndahalneʼii ałdóʼ bindaanish łaʼdeełʼı̨́į doo biniyé yíká inídaalwoʼ. Índa ídahoołʼaahii yił ahéédahoolzįįh dóó beʼoodląʼ nooséiiłgo yaa dahodiitsʼı̨́įhgo yaa bił dahózhǫ́. Díí hastóí ‘ałchʼooní nilı̨́įgo’ tʼáá bí nihá naʼádíltʼeʼgo nihíká anáhiʼnilchééh. (2 Corinthians 8:23) God dayoodlánígíí dóó yaa ádaʼdeiistʼánígíí binahjįʼ bidaʼiilʼı̨́į doo.​—Hebrews 13:7.

• Circuit Overseer daolyéhígíí áłah nídaʼadleehgóó haʼátʼíí biniyé yitah nídadikah?

• Díí hastóí nihitah nídadikahgo haash yitʼéego níká adoolwoł?