Barunaba hamwe n’entumwa Paulo nibagambwaho munonga omu Byahandiikirwe eby’Orugriika. Abareeberezi abo bakaba bataayaayira ebibiina ebyabandize. Ahabw’enki? Ahabw’okuba bakaba nibafayo munonga aha b’eishe-emwe bagyenzi baabo. Paulo akagira ngu akaba naayenda ‘kugarukayo kutaayaayira ab’eishe-emwe’ kureeba oku bari. Akaba aba ayeteekateekire kugyenda engyendo ndaingwa kugira ngu abaase kugumya ab’eishe-emwe. (Ebyakozirwe 15:36) N’omu bunaku obu nikyo kigyendererwa ky’abareeberezi abarikutaayaayira ebibiina.

Nibatutaayaayira kutugumya. Buri mureeberezi orikutaayaayira ebibiina naataayaayira buri kibiina emirundi ebiri buri mwaka, amara nakyo esaabiiti. Abareeberezi aba nitubaasa kubeegaho bingi hamwe n’abakazi baabo baaba babaine. Nibateeraho kutumanya twena abakuru n’abato abari omu kibiina, kandi nibaba baine ekihika kubuurira naitwe n’okugyenda naitwe aha beegi baitu ba Baibuli. Abareeberezi aba nibagyenda n’abareeberezi b’ekibiina kugumya ab’eishe-emwe kandi nibaha n’embazo omu nteerane z’ekibiina n’aha nteerane empango kutugumya.—Ebyakozirwe 15:35.

Nibafayo ahari boona. Abareeberezi abarikutaayaayira ebibiina nibafayo munonga kuhwera ab’eishe-emwe omu by’omwoyo. Nibagira oruteerane n’abareeberezi hamwe n’abaheereza kumanya oku ekibiina kirikukora n’okubaha obuhabuzi kubahwera kuhikiiriza obujunaanizibwa bwabo. Nibahwera baapayoniya kwongyera kubuurira gye, kandi nibashemererwa kumanya abasya n’oku barikweyongyera kukura omu mazima. Buri omwe aha bareeberezi aba naayehayo ayekundiire kukora naitwe ahabw’oburungi bwaitu. (2 Abakorinso 8:23) Nitubaasa kutooreza okwikiriza kwabo na rukundo ei bainiire Ruhanga.—Abaheburaayo 13:7.

• Ahabw’enki abareeberezi abarikutaayaayira ebibiina barikututaayaayira?

• Noobaasa kugasirwa ota omu kutaayaaya kwabo?