Киристон Грекъаг Финстити арӕх дзурд фӕццӕуй апостол Павел ӕма Варнави туххӕй. Етӕ лӕггадӕ кодтонцӕ цӕуӕг цӕстӕдаргутӕй ӕма бӕрӕг кодтонцӕ, фиццаг ӕноси ци ӕмбурдтӕ адтӕй, уони. Сӕ нисан адтӕй хуӕртӕ ӕма ӕнсувӕрти ӕууӕндундзийнадӕ федар кӕнун. Еу хатт Павел Варнавӕн загъта, цӕмӕй, ци горӕтти игъосун кодтонцӕ, уоми ӕнсувӕрти бабӕрӕг кодтайуонцӕ ӕма, куд ӕнцӕ, уой базудтайуонцӕ. Ӕма уой туххӕй цӕттӕ адтӕй сӕдӕгай километртӕ дӕр фӕццӕунмӕ (Гъуддӕгтӕ 15:36). Абони дӕр цӕуӕг цӕстӕдаргутӕ хуӕртӕ ӕма ӕнсувӕртӕбӕл уотӕ тухсунцӕ.

Нӕ нифс нин бафедар кӕнунцӕ. Районон цӕстӕдаргутӕй алке дӕр анзмӕ дууӕ хатти бабӕрӕг кӕнуй еу-20 ӕмбурди ӕма алли ӕмбурди хӕццӕ дӕр еу къуӕре балӕггадӕ кӕнуй. Еци ӕнсувӕрти ӕма сӕ бийнойнӕгти лӕггадӕй берӕ цидӕртӕ ес зундӕн райсӕн. Етӕ ӕмбурди алке хӕццӕ дӕр, ӕригӕнтти хӕццӕ дӕр ӕма каргунти хӕццӕ дӕр, базонгӕ унцӕ. Удта хестӕр нӕлгоймӕгти хӕццӕ ӕмбурдӕй еуӕй-еуети бабӕрӕг кӕнунцӕ. Уомӕй уӕлдай ма син ӕмбурди ӕма конгрессти ци радзубандитӕ фӕууй, уони фӕрци нин нӕ нифс бафедар кӕнунцӕ (Гъуддӕгтӕ 15:35).

Сӕ гъос дарунцӕ ӕмбурди алцӕмӕ дӕр. Районон цӕстӕдаргутӕ сӕ гъос фӕддарунцӕ, алли ӕмбурд дӕр ци уавӕри ӕй, уомӕ. Етӕ хестӕр нӕлгоймӕгти хӕццӕ фембӕлунцӕ, цӕмӕй базононцӕ, ӕмбурдӕн ци бантӕстӕй, уой ӕма еци ӕнсувӕртӕн раттунцӕ унаффитӕ, сӕ бон сӕ ихӕстӕ хуарз ӕнхӕст кӕнун куд ӕй, уой фӕдбӕл. Удта ма банхус кӕнунцӕ пионертӕн дӕр, цӕмӕй адӕми зӕрдитӕмӕ над ерун зононцӕ. Ӕмбурди нӕугутӕн дӕр рӕстӕг иссерунцӕ, сӕ хӕццӕ базонгӕ унцӕ, ра сӕ фӕрститӕ кӕнунцӕ, рӕстдзийнадӕ куд базудтонцӕ ӕма сӕмӕ цӕхуӕн нисӕнттӕ ес, уобӕл. Еци ӕнсувӕртӕ ӕнцӕ не ’мкосгутӕ ӕма «мах туххӕй хъиамӕт кӕнунцӕ» (2 Коринфӕгтӕмӕ 8:23). Гъӕуама син мах дӕр се ’ууӕндундзийнадӕ фӕнзӕн ӕма Хуцаубӕл уони хузӕн еузӕрдон уӕн (Дзиуиттӕгтӕмӕ 13:7).

• Районон цӕстӕдаргутӕ ӕмбурдтӕ цӕмӕн бӕрӕг кӕнунцӕ?

• Районон цӕстӕдарӕг уин уе ’мбурд ку бӕрӕг кӕна, уӕд е дӕуӕн ци пайда ӕрхӕсдзӕй?