17 EL SUOBEL
Te Mekerang a Rudam el Oldingel a Ongdibel e Olengeseu er Kemam?
Malawi
Rechad el oldingel
Oldingel a obliil
Miting er a remechuodel
Aike el Bades el tekoi er a Grik a blechoel el melekoi el kirel a Barnabas me a apostol el Paulus. Tirka el odam a uleldingel aike el mle kot el ongdibel. E ngera uchul? E le te kmal mle kerekikl er aike el mo uchul a klungiolir a rudam er tir er a klaumerang. A Paulus a dilu el kmo ngmle soal el ‘lmuut el merael el mo oldingel er a rudam’ e leseterir el kmo te ua ngerang. Ngkilengei el rolii a kemanget el omerael me bo el sebechel el mong e melisiich er tir. (Rellir 15:36) Tiang a urungulir tirke el odam el oldingel a ongdibel er chelecha el sils.
Te me melisiich er kemam. A derta el odam el oldingel a ongdibel a ousbech er a ta el sandei el melisiich er a ongdibel el eru el taem er a ta el rak. Ngsebecham el ngmai a klungiolam er aike el tekoi el dilubech el mo er tirka el odam me a rebecherir a lsekum e te bechiil. Tirka el odam a melasem el mo medengelterir a rebek el chad, el meklou me a remekekerei, e kmal sorir el obengkemam sel ki mosuub a Biblia el obengterir a rechad me sel ki moldingel a obliil. Te dirrek el obengterir a remechuodel el oldingel er kemam, e melisiich er kemam el oeak aike el cheldecheduch el ngar er a miting me a kuk bebil er a meklou el ongdibel.—Rellir 15:35.
Te olecholt a klemeriarreng el mo er a rokui el chad. A rudam el oldingel a ongdibel a kmal semeriar er a deleuill er a rechad er a bek el ongdibel el obengkel a Jehovah. Te mo dmak tir me a remechuodel me tirke el odam el olengeseu er a remechuodel e mesaod el kirel a ngelsecheklel a ongdibel e dirrek el mesterir tirka el odam a ungil el ulekrael el mo meruul a ngerechelir. Te dirrek el olengeseu er tirke el pioneer el mo ungil er a omesiungir, e dmeu a rengrir el mo medengelterir a rebeches el chad el mla me teloi er a ongdibel e mo medengei el kirel a ngelsecheklir er a klemerang. A derta er tirka el odam a kmal kongei el mo kldemam el ‘oureor el kiram.’ (2 Korinth 8:23) Ngkiram el oukerebai er a klaumerang me a blakerreng er tir el mo er a Dios.—Hebru 13:7.
Ngera uchul me tirka el odam a oldingel a ongdibel?
Ke mekerang e ngmai a klungiolem er a odngelir?
