Escrituras Griegas Cristianas Bernabemanta y Pablumanta ashca cutis ’rimancu. Chá ckaristas huauckes visitajcuna congregaciunesta huajyacuncu y chá tiempumanta congregaciunesta visítaj carancu. ¿Imajchus visitácoj carancu? Alli interés huauckesnincu espiritualesraycu ckaacherancu. Pablu huauckesninta cutis visitayta munara ckaáypaj si alli tiancu. Mana importas si ashca kilómetros huauckesninta animapúcoj ’rinan tiara (Hechos 15:36). Huauckes visitajcuna congregaciunesta cunan punchaumanta huauckesninta quiquin sentimientusta apincu.

Animaanaycúpaj amuncu. Huauckes visitajcuna congregaciunesta íshcay chunca (20) o astaan congregaciunesta visitancu y suj semana sapa congregaciunuan, íshcay cutis huatapi tiancu. Cá huauckespa esperienciasnincunamanta ashca beneficiút sorckoyta atiycu y huarmisnincunamanta, si casarasckas cancu. Paycuna esforsacuncu tucuycunát ’rejsíypaj, y ’ríypaj nockaycuan predicáypaj dispuestus tiancu y visitayta picunasta yachachishcaycu. Cá huauckes visitajcuna huauckes capacitasckaan visitancu huauckesta animáypaj; súmaj discursusnincuan tantacunaspi y atun tantacunaspi animaaycu (Hechos 15:35).

Tucuycunaraycu interesacuncu. Huauckes visitajcuna congregaciunta congregaciunesraycu ashca interés apincu, imaina espiritualmente tiancu. Paycuna huauckes capacitasckaan y huauckes capacitasckas yanapajcunaan tantanacuncu ckaáypaj imaina congregaciun huiñas ’rin y alli consejusta ckocúypaj responsabilidaresuan allít cumplinancúpaj. Precursoresta yanapacuncu alli predicajcuna cáypaj y predicaciunpi allít ’ripucunánpaj, astaanpas, ’rejsiyta munancu picunasta nockaycuan tantanacuyta ckallarishcancu, yachaypas munancu imaina espiritualmente huiñashcancu. Sapa suj cá huauckesmanta nockaycuraycu yanapaaycúpaj esforsacuncu y suj «yanápaj allít ’rianaycúpaj» cancu (2 Corintios 8:23). Respetu y fencu Yayaman yachapianaycu tían.

• ¿Imajchus congregaciunesta visitancu, cá huauckes visitajcuna congregaciunesta?

• ¿Imaina ckam visitasnincumanta ashca beneficiu sorckoyta atinqui?