Biblia ricuchinmi apóstol Pablo, Bernabendi Cuirasha Purij cariuna anushcara. Paiguna tandarijcunara yanapangaj munanuca. ¿Imarasha yanapangaj munanuca? Paigunaga huauquiunaras, paniunaras cierto pacha llaquishcamanda yanapana munanuca. Pablo munacami huauquiuna imasna pasaushcaras yachangaj. Chiraigu caruma rina ashas ricallami tucui paiguna fera shinzhiyachingaj (Rashcauna [Hechos] 15:36). Tandarijcunara Cuirasha Purijcunaga, cuna timpui shinallara ranun.

Shinzhiyachingahua shamunun. Cuirasha purij huauquiunaga caran huata, ishqui cuti, ishqui chunga tandarijcunara yanapangaj purin. Caran tandarijcunahua shu semana pasanmi. Cai huauquiunaga ashca huatauna Jehová Diosta sirvishcamanda ñucanchira alira yanapanun, shinallara paiguna casarashca ashaga, paiguna huarmiunas ashcara yanapanun. Paigunaga maltaunaras, rucuunaras, tucuigunaras ricsingaj munanun, shinallara Bibliamanda rimangahua ñucanchihua ringaj munanun. Cai huauquiuna Tandarijcunara Cuirajcunahua, huaquin huauquiunara, paniunaras shinzhiyachingahua purinun. Shinallara tandarinaunai, asambleagunais gustu Bibliamanda yachachiscaunara uyachinun (Rashcauna [Hechos] 15:35).

Tucuigunara llaquinun. Cuirasha purijcunaga munanunmi tucui huauquiuna Jehová Diosta ali sirvinuchu. Cuirajcunahua, yanapajcunahuambas tandarijcunara imasna ashcara ricungahua tandarinaun, shinallara tandarijcunaga imasna mas yanapanara yachachingahuas tandarinun. Precursores nishcaunahua tandarinunmi imasna mas ali yachachijcuna tucunuchu nisha yanapangahua. Shinallara mushuj Bibliamanda yachaujcunaras, tandarinama shamujcunaras paiguna fera shinzhiyachingaj munanun. Cai huauquiunaga mana sambayasha ñucanchira ‘yanapajcunami’ anun (2 Corintios 8:23). Paiguna cuinta, Yaya Diosta tucui shunguhua sirvishunchi (Hebreos 13:​7).

• Cuirasha purij huauquiunaga ¿ima munaihuara tandarijcunama ricungahua shamunun?

• Candaga ¿imasnara yanapana ushanun?