О Християнска гръцка писания често хоратинен е Варнаваске тай е Павлеске. Он служиненас сар пътуваща надзорникя тай посетиненас е сборовиен таро първо веки. Соске? Соскето уле искрено загрижиме пере духовноне пхраленге. О Павел пхенгяс, кай мангел ‘те иринел пес тай те посетинел е пхрален’, за те дикхел сар си он. Ов уло готово те накхел бут баро дром, за те насърчинел лен. (Деяния 15:36) Авдиес–да е пътуващоне надзорникиен иси о също желание.

Насърчинен амен. Секо окръжно надзорники посетинел декхате 20 сборовиен, като дувар андо бреш ачшол йекх курко секоне сбориесте. Ащи те овел амен бари полза таро опити далкхе пхраленгоро, а ако си прандеме — таро опити ленгере ромниенгоро–да. Он старайнен пес те пенжарен сарто е тернен, чука е пхурен–да андо сбори, тай лошанен те жан аменца ки проповедно служба тай ко мануша, коленца сикльовас и Библия. О надзорникя керен пастирска посещения е старейшиниенца, а за те укрепинен амен изнесинен насърчителна проповегя ко събрания тай ко конгреся. (Деяния 15:35)

Проявинен интерес карик саворенде. О окръжна надзорникя си искрено загрижиме далкхеске саво си о духовно състояние е сборовиенгоро. Он киден пес е старейшиниенца тай е помощник–служителенца, за те обсъдинен о напредъки е сбориескоро тай те ден лен практична съвекя сар те изпълнинен по–лачшес пере отговорноскя. Он помагинен е пионериенге те ачшон по–резултатна пере службате тай лошанен те запенжарен пес е неве манушенца андо сбори тай те шунен сар он напредвинен духовно. Секо йекх далкхе пхралендар охотно дел пестар сар ‘сътрудники, ковато служинел амаре лачшипнаске’. (2 Коринтяни 8:23) Аме–да требинел те сикавас вяра тай отдаденост е Девлеске сар ленгере. (Евреи 13:7)

• Соске о окръжна надзорникя посетинен е сборовиен?

• Сар ащи те овел тут полза таро посещения ленгере?