Den Kresten Griki Buku fu Bijbel e taki furu fu Barnabas nanga na apostel Paulus. Den man disi ben fisiti den fosi gemeente. Fu san ede? Den ben broko den ede trutru nanga den Kresten brada nanga sisa. Paulus ben taki dati a wani ’drai go baka fu go luku’ fa a ben go nanga den brada. A ben de klariklari fu waka hondrohondro kilometer fu tranga den brada (Tori fu den apostel 15:36). Na dati den kring-opziener fu wi wani du tu na ini a ten disi.

Den e kon fu gi wi deki-ati. Ibri kring-opziener e fisiti sowan 20 gemeente èn tu leisi wan yari a de wán wiki nanga ibriwan fu den gemeente. Wi kan leri furu fu na ondrofeni fu den brada disi èn fu den wefi fu den efu den trow. Den brada disi nanga den wefi wani kon sabi yonguwan nanga owruwan. Den wani wroko nanga wi na ini a preikiwroko èn den wani go nanga wi na den Bijbelstudie fu wi. Den kring-opziener e go makandra nanga den owruman fu fisiti wi. Den e hori lezing na den konmakandra nanga bigi konmakandra fu tranga wi èn fu gi wi deki-ati.—Tori fu den apostel 15:35.

Den e broko den ede nanga wi alamala. Kring-opziener trutru wani taki den brada nanga sisa na ini den gemeente abi wan tranga bribi. Den e kon makandra nanga den owruman nanga dinari ini a diniwroko fu luku fa a gemeente go na fesi èn fu gi den rai di o yepi den fu du den wroko moro bun. Den e yepi den pionier tu fu du a preikiwroko moro bun. Den wani kon sabi den nyunwan di e kon na den konmakandra, èn den wani sabi efu den e go na fesi na ini a tru anbegi. Ibriwan fu den brada disi de klariklari fu ’wroko nanga wi fu yepi wi’ (2 Korentesma 8:23). Wi musu teki wan eksempre na a bribi fu den èn na a fasi fa den e dini Gado fayafaya.—Hebrewsma 13:7.

• Fu san ede den kring-opziener e fisiti den gemeente?

• Fa yu kan kisi wini te den e fisiti a gemeente?