E mahani oi taku mai e nā Tuhituhiga Kelihiano Eleni ia Panapa, ma te apohitolo ko Paulo. Nā tāne iēnei na kavea ma ni tino tauhi malaga, e ahiahi ki nā fakapotopotoga muamua. Aiheā? Nae popole moni ki latou ki nā manakoga o latou uho fakateagaga. Na lea mai Paulo ko ia nae fofou ke “toe fōki oi āhiāhi ki te kau” uho ma kikila pe ā mai ki latou. Na lotomalie ia ke malaga mo te fia helau o maila (km) ke fakamalohi ai ki latou. (Galuega 15:36) Ko te manakoga tēnā o matou tino tauhi malaga i nā aho nei.

E ōmamai ki latou ke fakamalohi ai ki tatou. Ko te tino tauhi matāgaluega e ahiahi ki nā fakapotopotoga e 20 ma nofo mo he vaiaho, e lua nā taimi e fai ai te ahiahiga i te tauhaga. Ko te tino tauhi kogāfenua e malaga atu ki nā matāgaluega e hefulu, ma ahiahi ai nā fakapotopotoga oi kavea ia ma takitakifono o nā fonotaga matāgaluega, e tahi te taimi e fai ai i te tauhaga. E mafai oi maua e ki tatou nā aogā hili mai te poto mahani o nā uho iēnei kāfai kua fakaipoipo, ma a latou āvaga. E taumafai ki latou ke iloa nā tino talavou ma matutua, ma naunau foki ki latou ke olo ma ki tatou i te galuega tālaki ma olo fakatahi foki ki a tatou hukehukega faka-Tuhi Paia. Ko nā tino tauhi iēnei e fai ni ahiahiga leleo-mamoe ma nā toeaina, ma fai ni a latou lauga e fakamalohi ai ki tatou i nā hauniga ma fonotaga.​—Galuega 15:35.

E fakaalia e ki latou te fiafia ki nā tino uma. Ko nā tino tauhi malaga e māelegā ma fiafia ki te tulaga fakateagaga o nā fakapotopotoga. E fetaui ki latou ma nā toeaina ma nā kaukauna fehoahoani ke iloilo te tuputupu ake kua i ei ma kavatu ni fautuaga aogā i te fai o latou tiute taukave. E fehoahoani atu ki nā paeonia ke manuia te latou tālakiga, ma fiafia foki ki latou ke fetaui ma nā tino fou kua fātoā kau fakatahi ma fakalogo ki te latou fakahologa fakateagaga. E fiafia nā uho tauhi takitahi oi fakaavanoa he taimi ke “tautua [mai] ki a te [ki tatou].” (2 Kolinito 8:​23) E tatau ke mulimuli atu ki tatou ki o latou fakatuatua ma tuku atu ki te Atua.​—Epelu 13:7.

• He ā te mafuaga e ahiahi ai nā tino tauhi malaga ki nā fakapotopotoga?

• E mafai vēhea oi maua e koe te aogā mai te latou ahiahiga?