LĒSONI 17
‘Oku Tokoni‘i Fēfē Kimautolu ‘e he Kau ‘Ovasia Sēketí?
Malauī
Kulupu malanga
Ngāue fakamalanga
Fakataha ‘a e kau mātu‘á
‘Oku toutou lave ‘a e Ngaahi Konga Tohi Tapu Faka-Kalisi Kalisitiané kia Panepasa mo e ‘apositolo ko Paulá. Ko e ongo tangatá ni na‘á na ngāue ko e ongo ‘ovasia fefononga‘aki, ‘o na ‘a‘ahi ki he mu‘aki ngaahi fakataha‘angá. Ko e hā hono ‘uhingá? Na‘á na tokanga mo‘oni fekau‘aki mo e lelei ‘a hona fanga tokoua fakalaumālié. Na‘e pehē ‘e Paula na‘á ne loto ke ‘foki ‘o ‘a‘ahi ki he fanga tokouá’ ke ‘ilo‘i pe ‘oku nau fēfē. Na‘á ne loto-lelei ke fononga ‘i he maile (kilomita) ‘e lauingeau koe‘uhí ke fakaivimālohi‘i kinautolu. (Ngāue 15:36) Ko e holi ia ‘oku ma‘u ‘e he‘emau kau ‘ovasia fefononga‘aki he ‘aho ní.
‘Oku nau ha‘u ke fakalototo‘a‘i kimautolu. Ko ha ‘ovasia sēketi ‘okú ne ‘a‘ahi takai ‘i he fakataha‘anga ‘e 20 pe ofi ki ai, ‘o fakamoleki ‘a e uike ‘e taha ‘i he fakataha‘anga taki taha ‘o tu‘o ua he ta‘u. ‘E lava ke mau ma‘u ‘aonga lahi mei he hokosia ‘a e fanga tokoua ko ení mo honau ngaahi uaifí ‘o kapau ‘oku nau ‘osi mali. ‘Oku nau feinga mālohi ke hoko ‘o maheni tatau pē mo e iiki pea mo e lalahi, pea ‘oku nau vēkeveke ke ngāue fakataha mo kimautolu ‘i he ngāue fakafaifekaú pea ‘i he‘emau ngaahi ako Tohi Tapú. Ko e kau ‘ovasia ko ení ‘oku nau fai ‘a e ngaahi ‘a‘ahi fakatauhisipi fakataha mo e kau mātu‘á, pea ke fakaivimālohi‘i kimautolú, ‘oku nau fai ‘a e ngaahi malanga fakalototo‘a ‘i he ngaahi fakatahá mo e ngaahi ‘asemipilií.—Ngāue 15:35.
‘Oku nau fakahāhā ha mahu‘inga‘ia ‘i he tokotaha kotoa. ‘Oku mahu‘inga‘ia lahi ‘a e kau ‘ovasia sēketí ‘i he tu‘unga fakalaumālie ‘o e ngaahi fakataha‘angá. ‘Oku nau fakataha mo e kau mātu‘á mo e kau sevāniti fakafaifekaú ke vakai‘i ‘a e fakahoko ngāue kuo faí mo ‘oange kiate kinautolu ha fale‘i ‘aonga ‘i hono fakahoko ‘a honau ngaahi fatongiá. ‘Oku nau tokoni ki he kau tāimu‘á ke ‘ai ke lavame‘a ‘a ‘enau ngāue fakafaifekaú, pea ‘oku nau fiefia ‘i he hoko ‘o maheni mo e fa‘ahinga ‘oku fai ‘a e feohi fo‘ou mo iá pea fanongo ki he‘enau fakalakalaka fakalaumālié. Ko e fanga tokoua taki taha ko ení ‘oku nau loto-lelei ke ngāue‘aki kinautolu “ko ha kaungāngāue ki ha lelei [ma‘amautolu].” (2 Kolinitō 8:23) ‘Oku totonu ke mau fa‘ifa‘itaki ki he‘enau tui mo e lī‘oa ki he ‘Otuá.—Hepelū 13:7.
-
Ko e hā ‘a e taumu‘a ‘o e ‘a‘ahi ‘a e kau ‘ovasia sēketí ki he ngaahi fakataha‘angá?
-
‘E lava fēfē ke ke ma‘u ‘aonga mei he‘enau ngaahi ‘a‘ahí?
