Ebyahandiikirwe eby’Oruyonani bibaza muno hali Baranaba n’omukwenda Paulo. Abasaija banu baali barolerezi ababungiraaga ebitebe by’Abakristaayo ebyabandize. Habwaki bakoraga ekintu kinu? Habwokuba baali nibafaayo muno ha nyikara y’ab’oruganda ey’ebyomwoyo. Paulo akagamba akaba nagonza ‘bagarukeyo okubungira beene baabu’ okubarora oku baali. Akaba ayetekaniize kurubata orugendo oruraira muno kugenda kugarramu ab’oruganda amaani. (Engeso 15:36) N’abarolerezi abatwine hati baine ekigendererwa nikyo kimu.

Batubungira kutugarramu amaani. Buli murolerezi w’ekicweka (omurolerezi wa circuit) abungira ebitebe nka 20. Buli kitebe akibungira emirundi ebiri omu mwaka, n’amara nakyo wiiki emu buli rubunga. Akasumi akatumara nabo mali twega ebintu biingi, kandi obu baba baswire, n’abakazi baabu tubegeraho ebintu biingi muno. Obu batubungira, bafaayo muno kumanya buli omu abato n’abakuru, kandi bagonza kugenda hamu naitwe kutebeza n’okwegesa abantu Baibuli. Abarolerezi bagenda n’abagurusi nibabungira ab’oruganda kubagarramu amaani, kandi embazo ezibaha omu nso’rokano zigumya okwikiriza kwaitu.—Engeso 15:35.

Bafaayo ha buli omu. Abarolerezi bafaayo muno kukonyera ab’oruganda boona kuba n’enkoragana enungi na Ruhanga. Baikaara n’abagurusi hamu n’abahereza kurora enkurakurana ehikirweho omu kitebe, n’okubaha amagezi g’okubakonyera kuhikirizaamu obujunanizibwa bwabu kurungi. Baha bapayoniya amagezi agarukusobora kubakonyera kuhikiriza kurungi obuhereza bwabu. Bagonza muno kumanya abahyaka abatandikire kuso’rokana n’okumanya omulingo barukukurakuranamu omu byomwoyo. Ab’oruganda banu bakora n’omutima gwabu gwona ‘nk’abakozi batahi baitu,’ ha bwaitu. (2 Abakolinso 8:23) Mali tusemerire kuhondera ekyokurorraho kyaabu.—Abaheburaniya 13:7.

• Habwaki abarolerezi babungira ebitebe?

• N’osobora ota kugasirwa omu kubunga kwabu?