Maṅwalo a Lugerika a Tshikriste kanzhi a bula Baranaba na muapostola Paulo. Vhenevha vhanna vho vha vhe vhalavhelesi vha dalelaho, vho vha vha tshi dalela zwivhidzo ḓanani ḽa u thoma ḽa miṅwaha. Ndi ngani? Vho vha vha tshi kwamea vhukuma nga mutakalo wa vhahavho vha muya. Paulo o amba uri o vha a tshi ṱoḓa u ‘tshimbila, u itela u yo vhona vhahawe.’ O vha o ḓiimisela u tshimbila khilomithara dza maḓana u itela u vha dalela uri a vha khwaṱhise. (Mishumo 15:36) Lwonolwo ndi lutamo lune vhalavhelesi vhashu vha dalelaho vha vha nalwo ṋamusi.

Vho ḓela u ri ṱuṱuwedza. Mulavhelesi muṅwe na muṅwe wa ḽiisela u dalela zwivhidzo zwa 20 kana u fhira, a fhedza vhege tshivhidzoni tshithihi, luvhili nga ṅwaha. Ri nga vhuyelwa vhukuma nga tshenzhelo ya vhenevha vhahashu na vhafumakadzi vhavho, arali vho vhinga. Vha ita vhuḓidini ha u ḓivha vhaswa na vhahulwane nahone vha fhisetshela u tshimbila na riṋe vhuḓinḓani ha tsimu na pfunzoni dzashu dza Bivhili. Vhenevha vhalavhelesi vha ita nyendo dza vhulisa na vhahulwane nahone vha ri khwaṱhisa nga u ṋekedza nyambo dzi ṱuṱuwedzaho miṱanganoni na maguvhanganoni.—Mishumo 15:35.

Vha na dzangalelo kha vhathu vhoṱhe. Vhalavhelesi vha ḽiisela vha na dzangalelo ḽihulu kha vhuimo ha muya ha tshivhidzo. Vha ṱangana na vhahulwane na vhashumeli u itela u vusulusa mvelaphanḓa ine ya khou itwa tshivhidzoni na u vha ṋea nyeletshedzo malugana na u hwala vhuḓifhinduleli havho. Vha thusa vhavulanḓila uri vha bvelele vhuḓinḓani havho nahone vha takalela u ḓivha vhathu vhaswa ngohoni vhane vha ṱanganela na tshivhidzo na u pfa nga ha mvelaphanḓa yavho muyani. Muṅwe na muṅwe wa vhenevha vhahulwane u ḓikumedzela uri a vhe ‘mushumisani na riṋe.’ (2 Vha-Korinta 8:23) Ri tea u edzisa lutendo lwavho na u ḓikumedza havho kha Mudzimu.—Vha-Heberu 13:7.

• Vhalavhelesi vha ḽiisela vha dalela zwivhidzo nga ndivho ifhio?

• Ni nga vhuyelwa hani nga u dala havho?