Agsob unabihon hira Bernabe ngan apostol Pablo han Kristiano Griego nga Kasuratan. Hira nag-alagad sugad nga nagbibiyahe nga paramangno nga nabisita ha mga kongregasyon han siyahan nga siglo. Kay ano? Tungod kay gintatagad nira an kaopayan han ira kabugtoan ha pagtoo. Hi Pablo nagsiring nga karuyag niya ‘balikon ngan duawon an kabugtoan’ basi makita an ira kahimtang. Andam hiya magbiyahe hin ginatos ka kilometro basi parig-unon hira. (Buhat 15:36) Ito gihap an ginbubuhat han nagbibiyahe nga mga paramangno yana.

Nagdadasig ha amon. An kada paramangno han sirkito nabisita ha mga 20 nga kongregasyon duha ka beses kada tuig. Naggagahin hira hin usa ka semana ha kada kongregasyon. Makakapahimulos kita tikang han ira eksperyensya ngan han kanan ira asawa, kon inasaw-an hira. Nangangalimbasog hira nga makilala an tanan, ngan naruruyag ha pag-upod ha pagsangyaw ngan pagdumara hin pag-aram han Biblia. Upod han mga tigurang, nabisita hira ha pagmangno ha amon, ngan ginpaparig-on kami pinaagi hin makapadasig nga pahayag ha mga katirok ngan asembleya.—Buhat 15:35.

Nagpapakita hin interes ha ngatanan. An mga paramangno han sirkito interesado gud ha espirituwalidad han kongregasyon. Nakikigmiting hira ha mga tigurang ngan mga ministeryal nga surugoon basi kitaon an pag-uswag han kongregasyon ngan makahatag hin praktikal nga sagdon may kalabotan han responsabilidad hito. Ginbubuligan nira an mga payunir nga maglampos ha ministeryo, ngan nalilipay nga makilala an mga bag-ohan ngan mahibaroan an pag-uswag hito. Iginhahatag nira an ira kalugaringon sugad nga ‘kabulig ha pagbuhat tungod ha [amon].’ (2 Korinto 8:23) Sadang naton subaron an ira pagtoo ngan debosyon ha Dios.—Hebreo 13:7.

• Kay ano nga ginbibisita han mga paramangno han sirkito an mga kongregasyon?

• Paonan-o ka makakapahimulos han ira pagbisita?