Masonoko ma greke ma buklisto metatubila khumbu ziwombo Balinabasi ayi ntumua Polo. Babakala beni baba minkengidi mikodiatanga, yintia tuba babetulanga zinzietolo muingi mu tala bimvuka bi thete. Bila mbi e? Bila babe kukibanzanga kuwombo mu diambu di mambote ma bakhomba ziawu baklisto. Polo wutuba ti wuba ayi tsatu yi “vutuka bumina zikhomba” mu diambu di mona bue badidi. Wube kikininanga tula zinzietolo zi zikhama zikilometre mu diambu di kuenda kindisa baphangi. (Mavanga 15:36) Lumbu kiaki phe, minkengidi mikodiatanga mieto buawu beta tula.

Beta kuiza mu diambu di kutukindisa. Nkengidi wu kizungidila woso weta tala bimvuka keni 20, ayi weta viokisa sabala mosi mu kimvuka kimosimosi, khumbu wadi mu mvu. Kifuani kiawu ayi ki banketo bawu, enati bakuela, kieta kutusadisa buwombo. Minkengidi mikodiatanga ayi banketo bawu beta tula ngolo mu zaba baphangi boso, yiba bantuenia voti bambuta, ayi beta yangalala bima va kimosi mu kisalu kisamuna ayi longuka Bibila ayi batu. Minkengidi beni va kimosi ayi bakulutu beta kuenda vungula mamemi mu diambu di kubakindisa; beta tula diaka zidiskure zi lukindusu ku zikhutukunu zi kimvuka ayi ku zikhutukunu zinene.—Mavanga 15:35.

Beta yangalala ayi batu boso. Minkengidi mi zungidila beta tomba mbote zaba keni kimvuka kimosimosi kidi ayi nguizani mbote ayi Nzambi. Beta kutakana ayi bakulutu ayi bisadi mu kisalu mu diambu di tala phila yo kimvuka kilembo diatila, kubavana malongi momo mafueni muingi badedikisa mbote biyeko biawu. Beta sadisa minzibudi-nzila mu diambu di basala kisalu kiawu ki samuna mu bumbote, ayi beta yangalala bazabana ayi batu bobo bamekuiza bosi mu kimvuka, ayi wa phila yoyi minu kiawu kilembo kudila. Nkengidi woso weta kukivana buwombo mu diambu di kaba mutu wowo widi “nkundi mu kisalu mu diambu [dieto].” (2 Kolinto 8:23) Tufueti landakananga minu kiawu ayi kimfuzi kiawu mu kisalu ki Nzambi.—Ebeleo 13:7.

• Bila mbi minkengidi mi kodiatanga beta tadila bimvuka?

• Bue ndizulu awu mu kimvuka yilenda kusadisila?