Teʼ Kiliʼich Tsʼíiboʼob ich Griegooʼ yaʼab u yúuchul tʼaan tiʼ Bernabé yéetel tiʼ apóstol Pablo. Letiʼobeʼ tu beetaj u superintendente viajanteiloʼob yéetel tu xíimbaltoʼob le múuchʼuliloʼob yanoʼob teʼ kʼiinoʼob jeʼeloʼ. ¿Baʼax oʼolal tu beetoʼob? Utiaʼal u yáantkoʼob le sukuʼunoʼoboʼ. Pabloeʼ taakchaj u kaʼa xíimbaltik le sukuʼunoʼob utiaʼal u yilik bix u bintiʼoboʼ. Letiʼeʼ bin u líiʼs u yóoloʼob kex yaʼabkach kilómetros kajaʼanoʼob (Baʼaxoʼob 15:36). Teʼ kʼiinoʼobaʼ letiʼe baʼax oʼolal xan ku xíimbaltaʼal le múuchʼuliloʼob tumen le superintendente viajanteʼoboʼ.

Ku taaloʼob u líiʼsoʼob k-óol. Cada superintendente tiʼ circuitoeʼ ku xíimbaltik kex veinte múuchʼuliloʼob yéetel ku máansik junpʼéel semana tiʼ cada junpʼéeliʼ, lelaʼ kaʼatéen u beetik ichil junpʼéel jaʼab. Yaʼab baʼax jeʼel k-kanik tiʼ le sukuʼunoʼobaʼ bey xan tiʼ u yatanoʼob wa tsʼokaʼan u beeloʼobeʼ. Letiʼobeʼ ku yilik u kʼaj óoltikoʼob le táankelmoʼob bey xan le tsʼoʼok u chan yantal u jaʼabiloʼoboʼ. Uts tu tʼaan u binoʼob t-éetel kʼaʼaytaj bey xan k-il le máaxoʼob k-tsʼáaik xook tiʼob yéetel le Bibliaoʼ. Le superintendenteʼobaʼ ku binoʼob yéetel le ancianoʼob u líiʼsoʼob u yóol le sukuʼunoʼoboʼ; tsʼoʼoleʼ teʼ muchʼtáambaloʼob yéetel teʼ asambleaʼoboʼ ku máanskoʼob maʼalob tsoltʼaanoʼob utiaʼal u líiʼskoʼob k-óol (Baʼaxoʼob 15:35).

Ku yáantkoʼob tuláakal. Le superintendenteʼob tiʼ circuitooʼ u kʼáatoʼob ka muʼukʼaʼanchajak le múuchʼuliloʼoboʼ. Letiʼobeʼ ku muchʼkubaʼob yéetel le ancianoʼob bey xan yéetel le siervo ministerialoʼob utiaʼal u yilkoʼob baʼaxoʼob tsʼoʼok u beetik le múuchʼuliloʼ yéetel ku yaʼaliktiʼob bix jeʼel u maas beetkoʼob maʼalob u meyajoʼobeʼ. Ku yáantkoʼob xan le precursoroʼob utiaʼal ka u maas maʼalobkíint bix u kaʼansajoʼoboʼ, yéetel uts tu tʼaan u kʼaj óoltikoʼob le máaxoʼob maʼ úuch káajak u muchʼtaloʼob t-éeteloʼ. Cada juntúul tiʼ le sukuʼunoʼobaʼ jach ku xupkubaʼob teʼ kʼaʼaytajoʼ yéetel k-éet meyajoʼob utiaʼal k-utsil (2 Corintoiloʼob 8:23). Toʼoneʼ unaj k-ilik ka yanaktoʼon fe yéetel ka k-meyajt Dios jeʼex u beetkoʼoboʼ (Hebreoʼob 13:7).

• ¿Baʼax oʼolal ku xíimbaltaʼal le múuchʼuliloʼob tumen le superintendenteʼob tiʼ circuitooʼ?

• ¿Bix jeʼel a jóoʼsik u yutsil le xíimbaloʼob ku beetkoʼoboʼ?