Lu Stiidxaʼ Dios ni gucuá lu diidxaʼ griegu nabé rieeteʼ de Bernabé ne apóstol Pablu. Ca hombre riʼ gúcacaʼ binnigola ni yeganna ca neza binni ridagulisaa ni guyuu dxiqué. Xi bicaa laacabe gúnicabe dxiiñaʼ riʼ yaʼ. Bíʼnicabe ni purtiʼ dxandíʼ rizaaláʼdxicabe chuʼ ca xpinni Cristu galán. Pablu bisihuinni dxandíʼ racalaʼdxiʼ guibiguetaʼ chiganna ca xpinni Cristu para guʼyaʼ ximodo nuucabe. Laabe yegácanebe laacaʼ neca guzabe gayuaa kilómetru (Hechos 15:36). Yanna riʼ, ngaca nga ni rucaa stale de ca binnigola ni riganna ca neza binni ridagulisaa gúnicaʼ xhiiñacaʼ.

Riguucabe gana laadu. Cada superintendente de circuito rigánnabe biaʼ gande neza binni ridagulisaa ne rindaabe ti semana ra nuu cada tobi de laani ne chupa biaje rigánnabe cada neza binni ridagulisaa lu ti iza. Zanda guizíʼdidu stale de ca xpinni Cristu riʼ ne de xheelacabe, pa maʼ bichaganácabe. Laacabe rúnicabe stipa pur gunibiáʼcabe ca hombrehuiiniʼ ne ca dxaapahuiiniʼ ne zaqueca cani maʼ huaniisi, ne nabé riuuláʼdxicabe gucheechenécabe laadu diidxaʼ ne chinécabe laadu ra nuu ca binni ni cadúʼndanedu Biblia. Ca binnigola ni riganna ca neza binni ridagulisaa, rinécabe ca binnigola ora maʼ zigánnacaʼ ca xpinni Cristu; ne laaca rutiidicabe caadxi libana ni riguu gana laacaʼ lu ca guendaridagulisaa ni raca cada semana ne lu ca guendaridagulisaa roʼ (Hechos 15:35).

Rizaaláʼdxicabe guiradu. Ca superintendente de circuito riʼ nabé rizaaláʼdxicaʼ gacanecaʼ ca xpinni Cristu para chuʼcaʼ galán né Dios. Ridagulisaanécabe ca binnigola ne ca siervu ministerial para gúʼyacabe xi guiráʼ dxiiñaʼ huayúnicaʼ lade ca binni ridagulisaa ne gudiicabe laacaʼ conseju ni zacané laacaʼ gúnicaʼ xhiiñacaʼ jma jneza. Racanécabe ca precursor ti ganda cueenducaʼ ni galán ora gucheechecaʼ diidxaʼ, ne nabé riuuláʼdxicabe gunibiáʼcabe ca binni ni cuzulú cadagulisaané laadu ne riéchecabe ora gánnacabe modo cayúnicaʼ ni na Dios lu xquendanabánicaʼ. Cada tobi de ca xpinni Cristu riʼ rudiicabe guiráʼ stipa stícabe para gacanécabe laadu chuʼdu galán (2 Corintios 8:23). Nga runi, galán gápanu fe cásica nápacabe ne guni adorarnu Dios cásica rúnicabe (Hebreos 13:7).

• Xi para riganna ca superintendente de circuito ca neza binni ridagulisaa.

• Xi zanda guiziidiluʼ de ca superintendente de circuito.