Ngelañ ngeʼ ndùb te nsi là, Ghakwénta Yaweh Nsi num maʼ mfiʼ ndende neywimde fètfèt tse ngeʼ kwag yub là. Tshen nekagtùn nà nke ndaʼdʼà mbe zebe nkôni mfà num fèt ben keʼ ghù mfùm. (Yohané 13:34, 35; 1 Yohané 3:17, 18) Bag bin nke njwimdʼà ndùke?

Bag bin num mfà nkàb. Ngelañ nzikuʼ ndùb naʼ nte nsi ngô Yuda là, Benkristô tañlaʼ Antiôkia naʼ tum nkàb fèt tshob ntùm ngùtni. (Mfaʼ Ghantum 11:27-30) Be ndañndañ sènni, ngelañ be juʼ mbe fèt ben ntùm moʼ bag ngô tshwèt njuʼ kebwô là, be num ntshùade njam tshag ndà ntseʼde ntum fà bwôntù neywimde yub num bag ngub wut.​—2 Korintô 8:13-15.

Bag num njwimde mba bo mfaʼ. Ghakwé mbwe tse bo be dùʼ ngeʼ te nsi là, num ndoʼ mfiʼ nelèn dùʼ ze mba zit mvèt lo be là, num nelèn a be ze bo tswe mebwô là. Taʼ kum num neywimde num ntshagde neghapte jujù, ntse nenu, nzwe, dùʼ ntswe, mba mfu. Mbeʼ yàm Ghakwénta tse bo lèn faʼ là, num mfà wut yub bo yub nkàb num faʼ neywimde, ke nekut ba ndà Ntseʼde Nufen bo ba dùʼ ntswe tsʼa sa lo. Tamde zʼa be netèt bag là, bo bin bag jù nefaʼ ku ntshùʼ là, num ngù bag kùmde tshu faʼ bo ghafaʼ ndende ngelañ ngeʼ te nsi là. Mba tà ndù bag num njwimde “[fèt tshag ntùm] bamntù,” bag num mbèn njwimde tsemoʼ benntùn ngelañ a fà bu là, ke lôde yub tshôssi.​—Galatia 6:10.

Bag num mfà ywimde num bag ywèle, mba fidentù. Benntùn tse ngeʼ tèt yub là ghù nzi mbe bo fide ntù tshobe. A num mbe num tshen ngelañ nà, zebe neta fe à Yaweh Nsi, “Nsi fidentù.” (2 Korintô 1:3, 4) Bag bin num ndoʼ tsiañde nsoñ nkaʼni Ñwaʼni Nsi ba benntùn ngeʼ kwag yub bo ke bèn ngù nywinde là, mbèn nso ntù tshob bo juʼ mbe, ndaʼndaʼ Nufen Nsi biagde njoñ ba tshu tsʼa be ndoʼ ngùtni bo ngeʼ nseʼ yi là.​—Apokalipse 21:4.

• Numke Ghakwénta kuʼni neywimde ndende ngelañ ngeʼ te nsi à?

• Zit ywimde num bag ywèle bag bin kuʼni nefà benntùn ngeʼ kwag yub à?