Siatnapite hongtun’ ciang Jehovah Teci te’n siatna a thuak unaupihte a huh theih nading vaihawm pah uh hi. Hih banga hanciam taka huhna in khatlekhat tungah itna man hong lak hi. (Johan 13:34, 35; 1 Johan 3:17, 18) Koi bang danin kihuh ka hi uh hiam?

Sumpi ka khia uh hi. Kumzalom masa lai-a Judah gamah kialpi atun’ lai-in Antiok-a Kristian te’n a thu uppih mite ading huhna sum na khak uh hi. (Sawltak 11:27-30) Tua mah bangin mun danga om unaupih te’n haksatna a thuak lam ka zak uh ciang a manlanga a kisam vante huh theih nading pawlpi pan sumpi khia-in ka huh uh hi.—2 Korin 8:13-15.

Huhna ka pia takpi uh hi. Siatnapi a tun’ namun a, upate’n pawlpi mi khat ciat zongin a lungmuan’na munah kaikhawm uh hi. Nekding, dawnding tui-siang, nikten puansilh, buk nading buuk le zatuite hawm dingin siatna a thuakte ading huhna a pia committee te’n vaihawm uh hi. A kisam nasepna-ah siamna a nei Teci mi tampi in siatna a thuakte huhna-ah kihel-a, a kisia inn le kikhopna innte bawlpha dingin amau le amau sum kisikin kipiakhia uh hi. A kithutuak pawlpi ka hi uh a, na semkhawm den ka hih manun a kisap hun ciang a kisam vante le a semding mite manlang takin ka kikaikhawm thei uh hi. “Thu upna sungah i innkuanpihte” ka huh uh banah ahih theih leh bang biakna hitaleh huhna ka pia uh hi.—Galati 6:10.

Kha lam le lungsim lamah hehnepna ka pia uh hi. Siatnapi a tuak mi te’n a diakin hehnepna kisam uh hi. Tua bang hunte-ah “hehpihna a nei Pa” Jehovah kiang pan hehnepna ka ngah uh hi. (2 Korin 1:3, 4) A lungkia mite kiang Lai Siangtho kamciamte ka gen uh hi. A sawt loin Pasian Gam in natna, gimnate a hong piangsak ahi tuahsiatna khempeuh maimangsak ta ding hi cih lungmuang takin ka genpih uh hi.—Maangmuhna 21:4.

• Siatnapite a tun’ ciang Teci te’n manlang takin ba’hang huhna piathei uh hiam?

• A suaktate kha lamah koi bangin hehnepna pia ka hi uh hiam?