Lè i ni on katastròf, nou pa ka pèd tan : nou ka òwganizé- nou onfwa-onfwa pou pòté sèkou ba frè é sè an nou ki an détrès. Sé konsa nou ka montré kè lanmou-la nou ni pou yo la, sé on lanmou ki sensè (Jan 13:34, 35 ; 1 Jan 3:17, 18). Kijan nou ka édé-yo ?

Nou ka bay lajan. O prèmyé syèk, krétyen ki té Antyoch (an Siri) tann di ni moun ka mò-fen Jidé, alò yo voyé lajan anba-la ba frè é sè a yo (Akt 11:27-30). Jòdila, défwa nou ka vin sav kè, tèl ou tèl koté, zafè a frè é sè an nou mélé. Alò, adan kongrégasyon an nou, nou ka bay on lajan pou édé-yo (2 Korentyen 8:13-15).

Nou ka òwganizé-nou pou nou pòté-yo sèkou. Sé ansyen-la ki ka rété la katastròf-la fèt la, ka chèché a jwenn tout frè é sè ki adan kongrégasyon a yo pou sav si ayen pa rivé-yo. Yo ka fòwmé on gwoup, é gwoup-lasa ka òwganizé lésèkou. Yo ka prévwa a onlo biten kon dlo, manjé, lenj, médikaman, pansman, koté pou sé frè-la rété annatandan, etc. Sèwten Témwen ki ni on métyé ki itil adan dé ka konsa, ka vwayajé volontyé pou ay pòté sèkou, é sé yomenm ka péyé déplasman a yo. Yo ka réparé kaz é Sal di Wayòm ki krazé. Nou, Témwen a Jéova, nou soudé é nou abityé travay ansanm, kifè dépi nou sav frè é sè an nou bizwen-nou, nou ka réaji vit. Nou ka vin a sèkou a yo é, si nou pé, nou ka édé dòt moun osi, kèlkèswa rèlijyon a yo (Galat 6:10).

Nou ka itilizé Labib pou konsolé sa ki ka soufè é pou rèmonté moral a yo. Lè on moun sibi on katastròf, i vréman bizwen yo konsolé-y. Adan dé moman konsa, nou ka pran fòs owa Jéova, « Dyé a tout konsolasyon-la » (2 Korentyen 1:3, 4). Lè on moun an détrès, nou kontan palé èvè-y dè sa Bondyé ka pwomèt-nou. Konsa i sav kè talè, Wayòm a Bondyé ké fè, ki katastròf, ki doulè, ki soufrans, disparèt pou toujou (Révélasyon 21:4).

• Poukwa nou ka rivé réaji vit lè i ni on katastròf ?

• Kijan nou ka konsolé moun ki sibi on katastròf ?