Ngkana e riki te kabuanibwai ae karina n te tabo teuana, a waekoa ngkekei naba Ana Tia Kakoaua Iehova ni bairea te ibuobuoki nakoia tariia ake a rotaki iai. E kaotiotaki ara tangira ni koaua i marenara n aeka ni mwakuri akanne. (Ioane 13:34, 35; 1 Ioane 3:17, 18) N aaro raa aika ti ibuobuoki iai?

Ti bwaintangira n te mwane. N rokon te rongo ae korakora i Iuta, ao a anga te mwane Kristian rimoa ake i Antioka bwa buokaia tariia n te onimaki ikekei. (Mwakuri 11:27-30) N aron naba anne, ti kanakoi bwaintangira rinanon ara ekaretia ibukini buokani kainnanoia tarira ake a korakora rotakia n taabo riki tabeua, ngkana ti ongo ae a taonaki n te kangaanga.—2 I-Korinto 8:13-15.

Ti karaoi mwakuri n ibuobuoki. A mwiokoaki unimwaane ake a mena n te tabo are e riki iai te kabuanibwai ae karina bwa a na ukeria kaain aia ekaretia nako ao n taraia raoi bwa a bane n reke ao ni buokaki. E kona te komete ibukin tararuaani kainnanoia taari ni bairea karekean kanaia, nimaia te ran ae itiaki, kunnikaia, katanaia ao buokaia te bwainnaoraki. A bati naba taani Kakoaua aika kainnanoaki rabakauia ake a anganano ni mwanena mwanangaia nakon taabo aikai, n ibuobuoki ni katei mwenga ao Taabo n Taromauri ake a uruaki. Kioina ngkai ti katiteuanaaki n ara botaki ao rabakaura ake ti karekei ngkana ti kaai ni mwakuri, e a waekoa iai rekeni bwaai n ibuobuoki ao taani mwakuri n taai ake e kainnanoaki iai te ibuobuoki. E ngae ngke ti buokiia “ake a katiteuanaaki ma ngaira n te onimaki,” ma ti boni buokiia naba aomata riki tabeman n aron ara kona, n aki ongeia bwa tera aia Aaro.—I-Karatia 6:10.

Ti kabebetei nanoia man te Baibara ao ti kaotiota tangiraia. A rangi ni kainnanoa riki kabebeteaia naake a taonaki n te kabuanibwai ae karina. Ti karekei korakorara n taai akanne mairoun Iehova “ae te Atua ae te tia anga te kabebetenano n aekana nako.” (2 I-Korinto 1:3, 4) Ti kukurei n tibwaia nakoia naake a rawawata ana berita nako te Baibara, ao n anga te karaunano are e na waekoa Ana Tautaeka n Uea te Atua ni katoki kabuanibwai ni kabane aika karika te maraki ao te rawawata.—Te Kaotioti 21:4.

• E aera ngkai a waekoa n roko taani Kakoaua n ibuobuoki n taini kabuanibwai aika karina?

• Tera te kabebetenano man te Baibara are ti kona n tibwaia nakoia ake a reke maiuia man te kabuanibwai?