-Bho ˈkledɩ- klaeˈˈ ˈghlʋ ɲʋn in ɛnˈ, Zoova aˈ -Bobhlaʋn- an ˈˈdooˈ ʋa yea ʋaˈ ˈdhoudhi -ˈˈwe nɩan ˈe ˈkle ˈdhi bho jhi. Ɛɛˈ dhɛ tu ɛ toɛˈ -ka -a kman bha aˈ dɩ -kajɔɔnka a. (Zan 13:34, 35; 1 Zan 3:17, 18) Ka -aa nʋn ɲʋn sʋn bho -po sʋn -ɛn?

-Aa toɛ ˈo ˈghwɛi. ˈDhe tɛnˈˈ kmʋn ˈdhi ɛ, -da ˈmɩɛn klaaˈˈ pa ˈe Zude -bhlʋaˈ a, kletiɛn -ˈˈwe nɩan ˈe Antiɔsɩ -bhlʋaˈ a, ʋʋ kpa ʋaˈ ˈdhoudhi -ˈˈwe nɩan ˈe Zude ˈghwɛi. (Nʋʋdhɩ- 11:27-30) ˈKamɔn- -ke, -bho -a -ˈŋwɩɩn -ka -aaˈ ˈdhoudhi -ˈˈwe nɩan ˈbhlʋɩ ˈsrɩ ˈdhii ˈjhe dɩ ɛˈ, -aa ˈgboo ˈghwɛi -e ˈˈghwlii dhi -wɛeˈ -aaˈ ɲɔnsoagbu a kpɩ.—2 Kolɛntɩ 8:13-15.

-Aa muɛn ɲʋn sʋn bho poaˈ. Ɲɔnsoagbu aˈ ɲankɔʋn- nɩan -da ɲʋn ˈjhea dɩ ɛ, ʋa ˈbɔn Zoova aˈ -Bobhlaʋn dhi ˈˈdhe -bho ɲɔn se ˈe ɛ ˈdhi -sie- ɛˈ, ʋʋ ˈyɩ jhibho-. -Ka dhiidhɩ -e ˈˈnin -e ˈmʋnpaadhɩ -e kwɛin -e dhɩ -dhee -ˈnɩɩn ˈyea -gbleeɛ- sʋn nʋn ɛn, ɲʋnbhojhiʋn- anˈ jebhopoʋn- anˈ kpɔ -nɩn ˈo -ɔɔ ˈˈdu ɛɛˈ dɩ. Zoova aˈ -Bobhlaʋn- -duuˈˈ -ʋa- ˈghlʋ ˈo ʋaˈ ˈˈjɛ -gwlɩˈˈ -ʋa- mun -da ɲʋn ˈjheea dɩ ˈˈdhe ˈdhipɛngbi- -e ˈBheɔglɔ ɔˈ ˈˈGbi -ɩn -ˈkɔɔa a, -ʋa- pʋɩ ˈkpa. Ghluˈ iˈŋwɔɛn- nɩan ˈe -aaˈ -glibha- ˈdhi -e, po sʋn -da dhueˈ -wɛeˈ nʋn dhbho ɛ, ɩan poɛ -aʋ- sʋn bho -aa yea ɲʋn -an -ˈjhea ˈkle bho jhi ˈˈdoo-. Ɛ tɔˈdɩ-, ‘ɲʋn -nɩn -a nɩan ˈe dhɛgwlɩdeɛ- nɩan dhueˈ ˈdhi’ ɛ, -aa pʋbʋ sʋn bho. ˈKlaa -bho ɛɛˈ sʋn nɩn- ˈe ˈkwa aˈ, -aa po ɲʋn -ˈnʋʋn sʋn bho ˈmɛn -ke. -Bho -aa sʋbʋ sʋn bho po ɛˈ, -aaˈ -ŋmʋn ɲɔnsoagbu- ʋa muan ˈe ˈdhi jha.—Galasi 6:10.

-Aa jhiiɛ Biiblʋ i -aa yea ɲʋn dɩ -gwliˈi ˈˈdu. Ɲɔn -ˈjhea ˈkledɩ ɛ, ɔɔ ˈbɔn ɲʋn ˈyeɔ dɩ -gwliˈi ˈˈdu. -Bho -a nɩn ˈe ɩanˈ dɩ tu ˈdhi ɛˈ, Zoova, -ɔ nɩan “nyʋ dɩˈwwlii-ˈˈduɛ- klɛɛkpɛɛ Nyɔsoa” a, ɔmɔn- -ɔn -ˈˈɲɩn -aʋ- ˈkpɩ. (2 Kolɛntɩ 1:3, 4) Ɲʋn, -da -ʋʋ -ˈyea pa -ʋʋ sea ˈo ˈbhle ɛ, -bɔyaˈˈ -dɩ nɩan ˈe Biiblʋ ˈdhi mɩn- -aa tɔɔn ʋbʋ. Dhɩsaɩn- anˈ klɛɛ, -ɩan- paa ɲʋn ˈklejheɛ bho ɛ, ˈdhe nɔnˈˈ -dhɛ ˈˈzaan ˈdhi Ɲɔnsoa aˈ ˈBheɔglɔ ɔ muɛn ɩanˈ dhɩ tu iza-. Ɛmɛn- -aa tɔɔn ɲʋn -wɛeˈ -aa ˈˈdubʋ dɩ -gwliˈi.—Gbɔˈwlʋdhɩ- 21:4.

• -Ɛɛ po Zoova aˈ -Bobhlaʋn- sʋn bho -wɛeˈ ʋa ˈˈdoo ʋa jhi ɲʋn -ˈjhea ˈkledɩ bho -ɛ?

• Ka -aa nʋn ɲʋn dɩ -gwliˈi ˈˈdu sʋn -ɛn?