Yakhumelelaka masakha, Masaahiti a Yehova wowaakuvya anaatthenkaca mananna oopheela waakavihera mayamunnaaya anaanana masakha. Ayo meekurumicerwaayo anawoonihera wiira hiivano ninaafentana cinene. (Joau 13:34, 35; 1 Joau 3:17, 18) Manannani ninaakavihereehu ayo mayamunnaayo?

Ninaapanka micanko. Uwakati waalavaniyaaya itala uYuuta iseekulu yoopacera, makristau o Antiyokiya yahoveleeliha nsurukhu wiira yaakavihere mayamunnaaya. (Miteko 11:27-30) Ni hiivano ciicammo, nacuwelaka wiira ahaavo mayamunneehu anwanana masankiho, ninaaveleeliha micanko cinvahiya wanlokoni wiira akaviheriye ale atepale urikarikiya.—2 Akorintu 8:13-15.

Ninawaavaha nikavihero nimpheelaaya. Mahumu o ncoko ikhumelenle ihasara, anawiikurumica uwaavya mayamunna o wanlokoni wiira acuwele wakhala wiira otheene ahaavo saana. Mphwinko unkavihera yakhumelelaka ihasara unaakawa iyoolya, maaci, ikuwo, mapuro oorupa ni mirette. Masaahiti a Yehova anoorya utekatekaca anawiivaherera urwaa ninsurukhwaaya mapuro akhumelenle ihasara wiira yakavihere nteko woolokihaca inupa ni Isalau co Umwene citankuwacile. Waataana urineehu ni mayamunneehu, ni ucuwela utekatekaca ninkhalaneehu nlattu woovara nteko nkhayi, unaaniiriha uhipica upanka itthu wiira naakavihere mayamunneehu. Unookhalaru wiira nintepa waakavihera ale “anaaswalaneehu wamoca,” ciicammo wakhalaka wiira wanawoorannya ninawaakaviheraka atthu akhwaawe, woohiwehera ittiini caya.—Akalasiya 6:10.

Ninawaavaha makavihero omminepani ni anaattanyera nrima. Wootepesa, ale yaakhumelenle ihasara anaapheela umaalihiya. Ukati toko uyo, ayo pooti anlipihiyaaya ni Yehova, “Nluku rina mamaalihero otheene.” (2 Akorintu 1:3, 4) Hiivano ninawaahimyera ale atepale usanka anatiri ari mbiiblyani, naakhuluvelihaka wiira Umwene wa Nluku unaahala umaliha masakha otheene anwaana yoowerya ni uhuva.—Apokalipise 21:4.

• Isiyani impankaaya Masaahiti a Yehova wiira yaakavihere wowaakuvya ale yaakhumelenle ihasara?

• Isiyani iri Nnuulumoni na Nluku ninlamuliyeehu waahimyera ale yaakhumelenle ihasara wiira naamaalihe?