Kua̱ pan se̱ a̱ltepe̱ʼ tasosolowa ejeka o a̱ʼ, yej tajto̱lmoya̱waj de Jehová imaninsan timonechkowaj iga matikpale̱wi̱kan tokni̱wan yej moyo̱lmiktiáj. Iní̱n kine̱xtiá iga melá̱ timonekij (Juan 13:34, 35; 1 Juan 3:17, 18). ¿Kén titapale̱wiáj?

Titapale̱wiáj wan totomin. Tokni̱wan de Antioquía kimakakej tomin iga makipale̱wi̱kan iyikni̱wan de Judea kua̱ panoj se̱ weyi maya̱nalis (Hechos 11:27-30). Ijko̱nsan no̱, kua̱ tikmatij iga pan se̱ a̱ltepe̱ʼ sekin tokni̱wan akipiáj te̱ makikua̱kan, tikmakaj tomin pan totanechko̱lis, wan de ompa motitani (o moojmaga) iga wel matikpale̱wi̱kan ini̱nmej tokni̱wan (2 Corintios 8:13-15).

Tiawij titapale̱witij. Tayaka̱naj yej onokej kan taso̱sosoloj ejeka o a̱ʼ kite̱mowaj nochi tokni̱wan wan kiwi̱gaj kan welij maonokan ye̱kti. Anka se̱ comité yej tapale̱wiá kitas kén yawi momakati takual, a̱ʼ, tsotsol, wan kita kén yawij mopajti̱tij wan kan yawij kochitij tokni̱wan. Miakej tokni̱wan yej tapale̱wisnekij, iga itomin yawij hasta inó̱n a̱ltepe̱ʼ. Ompa tapale̱wiáj iga makiye̱ʼtali̱kan ikajlimej de tokni̱wan o Kajli kan monechkowaj. Wan iga tonokej sekan wan tisentekipanowaj, welij imanin tikpale̱wiáj tokni̱wan kua̱ tasosolowa ejeka o a̱ʼ. Wan aunke tikpale̱wiáj tokni̱wan, kua̱ welij tikchi̱waj tikpale̱wiáj no̱ seuʼmej aunke onokej pan seuʼ religión (Gálatas 6:10).

Tikyo̱lta̱liáj wan tikyo̱lketsaj pan Biblia. Kua̱ pan se̱ a̱ltepe̱ʼ tasosolowa ejeka o a̱ʼ, moneki matikyo̱ltali̱kan yej ompa cha̱ntitokej. Kua̱ panowa iní̱n, Jehová, «Dios yej nochipa te̱yolta̱liá», kipale̱wiá iga matajyo̱wi̱kan (2 Corintios 1:3, 4). Inó̱n iga, yej moyo̱lmiktijtokej tikne̱xtiliáj pan Biblia iga áchisan poliwi iga Irreinoj Dios yawi kitami̱ti nochi tejté̱ yej aye̱kti yej te̱yolmiktiá (Revelación 21:4).

• ¿Té íga welij imanin tikpale̱wiáj tokni̱wan kua̱ tasosolowa ejeka o a̱ʼ?

• ¿Kén welij tikyo̱lta̱liáj pan Biblia yej ayá̱ mikikej kan taso̱sosoloj ejeka o a̱ʼ?