Pakachitika soka, Mboni za Yehova zutwala thandizo kamangu-kamangu kwa abale akhuziwa. Vamene ivi ni umboni wakuti tili na chikondi ngacho-ngacho pakati pasu. (Yohane 13:34, 35; 1 Yohane 3:17, 18) Kansi tuŵayavya m’njila zotyani?

Tupeleka ndalama. Ku Yudeya pekwepona njala ikulu, Akhilisitu oyambilila a ku Antiyokeya etumija ndalama kuli abale auzimu. (Machitidwe 11:27-30) Sewo nase tikamvwa kuti abale m’vyalo viyakine akumana na soka, tutumija ndalama kupitila mu mipingo yasu kuti ziyavye akwasu ovutika.​—2 Akorinto 8:13-15.

Tupeleka thandizo yofunikila. Akulu amene ali kudela kwachitika soka, osakila-sakila abale na alongo onse a mu mpingo kuti aziŵe keno onse alibwino. Komiti yupanamila za chithandizo yuyendesha ntchito yoyaŵila vakulya, manzi akumwa, vovwala, malo oyona, komasoti thandizo ya mankhwala. Mboni zinyinji zamene zili na maluso zulipeleka mwa kukatishila ntchito ndalama zawo kuyatwala thandizo olo kuyakonza ng’anda za abale na Ng’anda za Ufumu. Gulu yasu ni yokatijana ngako soti taphunzila vinyinji mwa kuseŵenzela pamozi. Ivi vutiyavya kuchitapo kanthu kamangu-kamangu pakachitika soka. Olo kuti tuyavya ngako-ngako “abale na alongo ŵasu m’chikhulupililo,” tuyavyasoti ŵanthu a vipembezo viyakine mpata ukapezeka.​—Agalatiya 6:10.

Tupeleka thandizo yauzimu na chilimbikiso. Ŵanthu akakumana na soka, ofunikila chitonthozo chikulu. Pa nthawe yamene iyi, tupeza chilimbikiso kufumila kwa Yehova, “Mulungu wamene otitonthoja m’njila iliyonse.” (2 Akorinto 1:3, 4) Tuuja ŵanthu otaya ntima, malonjezo a m’Baibolo noŵasimikijila kuti lombapano Ufumu wa Mulungu ukafumyepo masoka onse otivutisha.​—Chivumbulutso 21:4.

• Ndaŵa yanji Mboni za Yehova zuchitapo kanthu kamangu-kamangu pakachitika soka?

• Kansi ŵanthu akumana na soka tingaŵapase chitonthozo chotyani chauzimu?