‘I he taimi ‘oku hoko ai ha fakatamaki, ‘oku fokotu‘utu‘u maau leva ‘e he Kau Fakamo‘oni ‘a Sihová ‘a e tokoni ke ‘oatu ha fakafiemālie ki honau fanga tokoua ‘oku uesiá. Ko e ngaahi feinga peheé ‘oku fakahaa‘i ai ‘a e mo‘oni ‘o ‘emau fe‘ofa‘akí. (Sione 13:34, 35; 1 Sione 3:17, 18) ‘I he ngaahi founga fē ‘oku mau tokoni aí?

‘Oku mau foaki ‘a e pa‘anga. ‘I he taimi na‘e hoko ai ha honge lahi ‘i Siuteá, ko e mu‘aki kau Kalisitiane ‘i ‘Aniteoké na‘a nau ‘ave ‘a e tokoni fakapa‘anga ki honau fanga tokoua fakalaumālié. (Ngāue 11:27-30) ‘Oku pehē pē, ‘i he taimi ‘oku mau ‘ilo ai ‘oku fehangahangai homau fanga tokoua ‘i he feitu‘u ‘e ni‘ihi ‘o e māmaní mo e faingata‘á, ‘oku mau ‘ave ‘a e ngaahi tokoni fakafou ‘i he‘emau fakataha‘anga fakalotofonuá ke fai‘aki ‘a e tokoni fakamatelie ki he fa‘ahinga ko ia ‘oku ‘i ai ‘enau fiema‘u vivilí.​—2 Kolinitō 8:13-15.

‘Oku mau tokonaki ‘a e tokoni ‘aonga. Ko e kau mātu‘a ‘oku nau ‘i he feitu‘u ‘o ha fakatamakí ‘oku nau kumi ‘a e mēmipa taki taha ‘o e fakataha‘angá ke fakapapau‘i ‘oku nau ‘i ai pea ‘oku malu ‘a e tokotaha kotoa. ‘Oku fokotu‘utu‘u nai ‘e ha kōmiti tokoni ‘a e tokonaki me‘akai, vai inu ma‘a, vala, nofo‘anga, mo e tokoni fakafaito‘o. Ko e Kau Fakamo‘oni tokolahi ‘oku ‘i ai ‘enau ngaahi pōto‘i ‘oku fiema‘ú ‘oku nau pole ke ‘alu ‘i he fakamole pē ‘a kinautolu ‘o kau ‘i he ngāue tokoní pe ke monomono ‘a e ngaahi ‘api mo e ngaahi Fale Fakataha‘anga kuo maumaú. Ko e fā‘ūtaha ‘oku mau ma‘u ‘i he tu‘unga ko ha kautahá mo e taukei kuo mau ma‘u ‘i he ngāue fakatahá kuo ‘ai ai ke mau malava ‘o tānaki vave ‘a e tokoni mo e kau ngāue ‘oku fiema‘ú ‘i he ngaahi taimi ‘o e faingata‘á. Neongo ‘oku mau fakaa‘u atu ‘emau tokoní ki he ‘fa‘ahinga ‘oku fekau‘aki mo kimautolu ‘i he tuí,’ ‘oku mau toe tokoni foki ki he ni‘ihi kehé ‘o ka malava, ‘o tatau ai pē pe ko e hā ‘a e lotu ‘oku nau kau ki aí.​—Kalētia 6:10.

‘Oku mau ‘oatu ‘a e poupou fakalaumālie mo fakaeongo. Ko e kau ma‘ukovia ‘i ha fakatamaki ‘oku nau fiema‘u tefito ‘a e fakafiemālie. ‘I he ngaahi taimi peheé, ‘oku mau ma‘u ‘a e mālohi meia Sihova, ‘a e “‘Otua ‘o e fakafiemālie kotoa pē.” (2 Kolinitō 1:3, 4) ‘Oku mau vahevahe fiefia ‘a e ngaahi tala‘ofa ‘a e Tohi Tapú ki he fa‘ahinga ‘oku siva ‘enau ‘amanakí, ‘o ‘oatu ‘a e fakapapau kuo vavé ni ke hanga ‘e he Pule‘anga ‘o e ‘Otuá ‘o fakangata ‘a e ngaahi me‘a fakamamahi kotoa pē ‘okú ne fakatupunga ‘a e langá mo e faingata‘a‘iá.​—Fakahā 21:4.

• Ko e hā ‘oku malava ai ‘a e Kau Fakamo‘oní ke fakafeangai vave ‘i he lolotonga ‘a e ngaahi fakatamakí?

• Ko e hā ‘a e fakafiemālie fakalaumālie ‘e lava ke mau vahevahe ki he kau hao mo‘uí?