Loko kuhumelela mhangu, Timboni ta Yehovha ti hantla ti yendla xa kukarhi swaku tiya pfuna vamakwerhu lava hlaseliweke. Minzamu yoleyo i xikombiso xa leswi hi rhandzisanaka xiswona. (Yohane 13:34, 35; 1 Yohane 3:17, 18) Hiva pfunisa kuyini?

Hi nyikela hi male. Ka nkama wa vapostola loko ndlala ya xin’wanamamani yi hlasele tiko la Yuda, vamakwerhu va le Antiyokiya va rhumele male swaku yiyava pfuna. (Mintirho 11:27-30) Hilaha kufanaka, na hina loko hi twa swaku vamakwerhu va ndhawu ya kukarhi va kumana ni swikarhatu, hiva rhumela male hi kutirhisa bandla la hina swaku yi pfuna ka swiyimu swa kutika leswi va kumanaka na swona. — 2 Vakorinto 8:13-15.

Hiva pfuna hi swilo swa hina. A madoda ya ndhawu leyi kuhumeleleke mhangu, ma lavetela hinkwavu va le bandleni kuva ma tiyiseka swaku va hlayisekile. Huvu ya kulamulela yi lulamisela mhaka ya swakudla, mati ya kubasa, mpahla, ndhawu ya kutshama ka yona ni kuva pfuna hi swa wudahu. Timboni ta Yehovha ta kutala letinga ni wutivi ka ntirho wa kukarhi, ta tinyikela hi kuswi rhandza leswaku ti ya ka ndhawu leyi kuhumeleleke mhangu kuva tiya pfuneta ka ntirho wa kulamulela kumbe wa kulunghisa tiyindlo letinga wonheka xikan’we ni Tiyindlo ta Mfumu ta Timboni ta Yehovha. Ava hakeliwi swaku va yendla leswo. A vun’we leli hinga na lona tani hi nhlengeletanu ni leswi hiswi djondzaka hi kutirha xikan’we, swihi pfuna kuya pfunisa hi xihantla lomu kunga ni xilaveko loko xiku ngindi. Hambileswi hi pfunaka lava hi gandzelaka Yehovha xikan’we, kambe hi tlhela hi pfuna ni vanhu van’wana loko swi laveka, na hinga na mhaka swaku i va wukhongeli muni. — Vagalatiya 6:10.

Hiva chavelela ni kuva tiyisa hi kutirhisa Matsalwa. Lavanga humeleliwa hi mhangu, lexi vaxi lavaka swinene i kutiyisiwa. Ka swiyimu swa kufana ni leswo, vanga tiyisiwa hi “Xikwembu lexi kuchavelela hinkwaku kuhumaka ka xona.” (2 Vakorinto 1:3, 4) Kutani hiva tiyisa nhlana hi switshembiso swa Bibele ni kuva tiyisekisa swaku kungali khale Mfumu wa Xikwembu wuta helisa timhangu hinkwatu letihi vangelaka swivavo ni kuhlupheka. — Nhlavutelo 21:4.

• Timboni ta Yehovha tiswi kotisa kuyini kuya pfunisa hi xihantla loko kuhumelela timhangu?

• Hi wihi nchavelelo wa Matsalwa lowu hingawu nyikaka lava poneke ka mhangu?