Kon may kalamidad, ginbubuligan dayon namon an amon kabugtoan nga naapektohan. Ito nga pangalimbasog nagpapakita nga hinigugma namon an usa kag usa. (Juan 13:34, 35; 1 Juan 3:17, 18) Ha ano nga paagi kami nabulig?

Nahatag hin donasyon. Han nagkaada duro nga gutom ha Judea han siyahan nga siglo, an mga Kristiano ha Antiokia nagpadara hin pinansyal nga bulig ha ira kabugtoan ha pagtoo didto. (Buhat 11:27-30) Ha pariho nga paagi, kon may-ada kami kabugtoan ha iba nga lugar nga naapektohan hin kalamidad, nagpapadara kami hin donasyon pinaagi han amon mga kongregasyon basi mabuligan hira.—2 Korinto 8:13-15.

Nagtatagana hin praktikal nga bulig. Nangangalimbasog an mga tigurang ha lugar han kalamidad nga hibaroan an kahimtang han tagsa nga membro han kongregasyon ngan siguruhon nga talwas hira. May relief committee nga nag-oorganisar ha pagtagana hin pagkaon, irimnon nga tubig, bado, urukyan, ngan medisina. Damu nga skilled nga mga Saksi an nagbuboluntaryo ha pagbulig o pag-ayad hin naguba nga mga balay ngan Kingdom Hall. Tungod han pagkaurosa ngan eksperyensya ha pagtrabaho nga urupod, nakakabulig dayon kami kon may kalamidad. Diri la an amon ‘kapariho hin pagtoo’ an amon ginbubuligan, nabulig liwat kami ha iba anoman an ira relihiyon.—Galasia 6:10, NW.

Nagtatagana hin espirituwal ngan emosyonal nga bulig. An mga biktima hin kalamidad labaw nga nagkikinahanglan hin pagliaw. Ha sugad nga higayon, nakuha kami hin kusog kan Jehova, “an Dios nga nagliliaw ha ngatanan nga kahimtang.” (2 Korinto 1:3, 4, NW) Malipayon nga iginsusumat namon ha mga biktima an saad han Biblia nga ha diri na maiha wawad-on han Ginhadian han Dios an ngatanan nga kalamidad nga hinungdan han kasakit ngan pag-antos.—Pahayag 21:4.

• Kay ano nga an mga Saksi nakakabulig dayon kon may kalamidad?

• Ano nga espirituwal nga pagliaw an iginhahatag namon ha mga biktima?