Órni rioʼ toib desgrasy lóodo ni nac testigos xtuny Jehová ni maca racnédo xhermando ni noʼ ló galnagan. Ndeʼ raduidy diitz que nigolú randxiʼdo saʼdo (Juan 13:34, 35; 1 Juan 3:17, 18). ¿Ximod racnédo layibu?

Raxeldo bidxiich. Órni goyoʼ toib galrralán gudx Judea ni cuanal Jesús de gudx Antioquía bixelyibu bidxiich par gocnéyibu biinreʼ (Hechos 11:27-30). Scúca, órni racaʼdo cuent que herman ni noʼ stoib lad ló Gudxlio cadudy ló desgrasy, lainy congregación xtunydo raduidydo bidxiich né modreʼ racnédo layibu gapyibu ni caquiinyibu (2 Corintios 8:13-15).

Rioʼdo racnédo layibu. Ancianos ni noʼ lagary ro rioʼ desgrasy, rioʼyibu galrasaʼ rayopyibu por tigaa herman par ganyibu pal nasac dxeeyibu. Sigory rioʼ toib grupo ni racné órni rioʼ desgrasy né xcuentyibu rioʼ guidzoo galrro, nís, lairy, láaca xcuentyibu noʼ gac galrrayopy lagary ro tzóʼ guirá buñreʼ, né chú dóctor guibí layibu. Xidal Testigos ni nann rony dxiin, stip layibu rieyibu par gacnéyibu, láaca rioʼyibu puext par guisaʼyibu yoʼ né Lagary ro radopdo. Por ni lóodo ronydo dxiin toibsi né ma nánndo ximod rac dxiinreʼ, puextca nóodo racnédo naguel órni noʼ galnagan. Per diti nosi racnédo «ni nac xhermando», láaca órni labúuni lóodo racnédo stipnés buñ ná nacyibu de nitisi religión (Gálatas 6:10).

Racnédo layibu né la Biblia né racnédo par guisacyibu sacró. Ni más raquiin buñ ni godudy ló desgrasy ngú que buñ gacné layibu guisacyibu sacró. Órni noyibu ló desgrasy, Jehová, «Dios ni racné lóodo guisacno sacró», raduidy fuers layibu (2 Corintios 1:3, 4). Rasuidydo buñ ni noʼ ló galrasaʼ xí ni sieed ló la Biblia, ni raslooy lóodo que Gobierno xtuny Dios mápa mer guinitló guirá desgrasy né galrrioop (Revelación 21:4).

• ¿Xigony labúu racnédo ni maca órni rioʼ toib desgrasy?

• ¿Ximod racnédo né la Biblia buñ ni cadudy ló desgrasy?